Market Insight：科網股值博率不俗

昨日兩大指標股分別做好，當中騰訊受惠於國家廣電總局公布第8批遊戲，其中集團的《尋仙2》獲批；而港交所則公布將推MSCI中國A股指數期貨。表面睇兩股都彈得唔錯，但今轉究竟係最後一升抑或整固完再上，就真係要拭目以待。

金蝶雲業務潛力厚

不過，其實現階段的指數上落已經反映唔到實際市況，好似近期港股回調，但見部分板塊依然升得唔錯，好似軟件股近排默默地反覆上揚，鑊氣唔錯，金蝶國際（00268）、金山軟件（03888）及美圖公司（01357）股價昨日分別升6.4至9.5%，大幅跑贏大市。

軟件股喺今浪升市中，算是防守力較強板塊之一。由於行業未見有重大利好消息，咁究竟資金係炒板塊追落後、現價估值吸引定係真係有後着呢？講到尾買貨原因其實唔緊要，最重要係順勢而為，既然板塊有勢，不妨順勢買番些少。

當中以具備雲概念的金蝶最值博，事關內地中小型企業普遍採用較便宜的雲端服務去管理自身財務及行政，令集團盈利前景具一定保證，其股價自年初在6元水平反覆升至昨日高見9.78元，短期若能在成交配合下衝穿10元關，隨時再展新升浪，值得喺9元水平小注跟進，跌穿20天線8.6元止蝕。

另外，在下主力推介的5G概念股同樣乘勢反彈，中國鐵塔（00788）、中國通信服務（00552）及中興通訊（00763）分別升1.7至3.9%不等。基於內地明確表示會以推動5G、人工智能及大數據等高端科技以發展經濟，故結論就係逢低吸納作中線部署，最重要係買貨唔使急，要見有低位先好入市。事關板塊擺明係慢火煎魚、長升長有格局，但短期跟隨大市波動難免。

創科暫宜保持觀望

另外，首日染藍的創科實業（00669）昨日最低見49.1元，之後跌幅收窄至1.4%報50.75元，險守50元關。有人話近年逢親「染藍」的股份多數無運行，但投資豈能一本通書睇到老，好似去年九月染藍後的申洲國際（02313）經歷回調後，已重新做番紅底股。所以股價表現，始終要睇番公司的基本因素。

回說出口北美洲及歐洲市場的創科，短期走勢仍受中美貿易談判拖累，能否守穩20天線約50元水平成後市關鍵，未有貨者宜先行觀望。

古勝