絲絲講場：時富黎永良筍價遊南美南極

等於港跟團打八折

佢話佢哋一行9人無喺香港跟團，而係喺意大利羅馬飛去南美洲，遊遍阿根廷、烏拉圭及智利等國家，再搭當地郵輪去咗8日南極，使費大約係香港跟團嘅八折。佢喺阿根廷品嘗過平至15美元（約117港元）嘅10安士頂級牛扒，睇過「世界新七大自然奇景」之一嘅伊瓜蘇瀑布，亦坐火車去過全球最南端城市烏斯懷亞（Ushuaia），可謂眼界大開。

而第一次去南極嘅佢最難忘係喺南極附近親親鯨魚、企鵝及海獅等動物，而且四圍都係雪白嘅山景、浮冰，空氣格外清新。佢話南極係全世界最大風、最環保嘅地方，一般人唔可以上岸，加上幾乎無網絡，唔可以上網，所以喺南極全程都係與世隔絕，唔使睇股市，好清靜咁話。

不過今次旅行，唔係Peter最長一次旅行，早喺一九九七年嗰陣，佢同太太及兩個讀緊中學嘅仔仔，一齊用咗兩個月嘅時間環遊世界，由東至西，遊歷澳洲、美國、歐洲及東南亞，再返香港，夠晒充實。佢建議大家趁年輕要多啲去旅行，讀萬卷書不如行萬里路嘛。依家佢各大洲都去過晒，至於下一個想去嘅地方係北極。

余絲韻