絲絲講場：科企億萬富豪食得古怪
外國科技界一眾億萬富豪普遍生活奢華，住喺億元豪宅別墅，以豪華跑車以至私人遊艇代步比比皆是。不過原來，佢哋平日喺飲食方面，又唔係一面倒要食得夠豪！
貝索斯最愛低脂八爪魚
好似全球首富、身家逾1,300億美元（逾萬億港元）嘅亞馬遜創始人貝索斯咁，曾透露自己早餐鍾意食得悠閒啲，而佢最愛食地中海八爪魚，貪佢低脂兼易食！
至於全球身家第二位、財富達965億美元嘅微軟創始人蓋茨每日都會飲最少3至4罐健怡可樂，但其實佢嘅飲食習慣唔係好健康，因為早餐鍾意食朱古力脆粒Cocoa Puffs，而午餐最愛食芝士漢堡包。
維珍集團及維珍銀河老闆布蘭森就最愛飲英式早餐茶，每日仲要飲足20杯，分分鐘飲茶多過飲水。
兩大社交網站Facebook同Twitter嘅創始人朱克伯格及杜斯，喺飲食上又有幾與眾不同？原來呢對歡喜冤家平日飲食好簡單。
杜斯烚蛋 朱仔愛劏羊
朱仔比較隨意，唔想花時間喺呢啲小事度，因此鍾意幫襯路邊快餐車。杜斯仲簡單，每朝喺屋企用滾水煮兩隻雞蛋，加啲醬油咁就一餐。之不過，早前杜斯曾爆朱仔喺屋企親手劏羊仔，當作晚餐招呼佢，聽落似乎嘔心咗啲！
此外，著名連續投資者庫班就選擇飲咖啡加兩塊低脂高纖曲奇做早餐，仲投資埋曲奇公司添！
至於已故蘋果教主喬布斯，市傳佢患有厭食症，有時一周只會食一至兩餐，最多食蘿蔔同蘋果。
余絲韻