美股調整持續，港股亦企唔穩兩萬九點，恒指昨日跌258點收報28,779點，主板成交降至1,083億元。市場基本面變化不大，主要仍是聚焦中美貿易談判、美元及人民幣匯價後向同英國脫歐，惟最近市場亦開始憂慮環球經濟前景。
美股回調壓力增加，到底港股抖完氣就回升定係呢勻真調整，咁就要有水晶球先知。但有一點可以肯定，就係中美即使簽得成協議，但後市走向仍須取決於當中條款，所以唔好以為簽完協議股市可當無事發生一樣，故入市仍然要保持審慎。
睇番昨日市況，早前強勢股普遍腳仔軟，好似內險及中資券商股都持續轉弱，中國人壽（02628）及中國平安（02318）分別跌4.2%及1.3%；HTSC（06886）、中信證券（06030）、廣發証券（01776）及中國銀河（06881）跌幅介乎2.4至4.1%，兩板塊轉弱趨勢頗為明顯。
此外，再睇埋港股兩大指標股表現，港交所（00388）昨日初步失守升軌支持，14日RSI回軟至62，MACD牛叉持續收窄，走勢已轉弱。至於騰訊（00700），股價周二先發力上破250天線，豈料昨日已經企唔穩，全日跌1.8%，短期若進一步失守350元，恐怕跌勢會進一步加劇，已持貨者要做好止賺/止蝕準備！
明顯地，部分投資者見美股及港股唔多對路，短期資金都要搵番個避風港。昨日公用股中電（00002）、煤氣（00003）及港燈（02638）均逆市上升；睇嚟領展（00823）及港鐵公司（00066）兩隻防守股短期隨時有運行，若然美股今轉升浪宣布玩完並掉頭向下的話，上述防守股短期繼續做好的機會唔細，其中可選擇散戶愛股煤氣及領展，兩者皆有不俗值博率。
另外，市場開始憂慮美國經濟增長放緩，主要出口股如藍籌股新貴創科實業（00669）以及敏華控股（01999），短期最好都係避一避以免損手。
古勝