絲絲講場：70%港女理財靠伴侶
瑞銀最新研究顯示，香港女性比起全球女性喺理財上更依賴另一半！有超過七成人將長遠財務決策交畀另一半，全球女性只有58%會咁做。尤其係20至34歲嘅香港千禧世代，將財務決策交給男性比例達65%，多過全球平均59%。但呢種做法令85%喪偶同離婚嘅香港女性後悔，無積極參與長遠財務決策。
大額購物反而做主導
瑞銀前年九月至今年一月，喺全球9個市場訪問近3,700名已婚女性，當中有2,251人係擁有至少100萬美元可投資資產高淨值女性，其中香港受訪者有367人。
調查發現，香港女性只係日常開支（77%）同大額購物決定（78%）嗰陣，先擔當主導角色或同配偶共同決策；僅20%嘅香港女性會主導長遠財務規劃。
瑞銀財富管理中國業務主管呂子杰話，香港女性傾向同配偶分工合作，集中處理家庭、孩子教育。此外，佢哋覺得配偶更擅長同了解理財。佢建議，因女性壽命較男性長，更需注意財務規劃，喺目前同未來生活上獲得自主，享受財務保障。事實上，識得同伴侶共同決策理財嘅女性，對個人財務前景更有信心，女性客戶亦會將家庭因素納入投資考慮，因此佢哋傾向買入債券、平穩基金及全權信託等資產。
余絲韻