絲絲講場：內地最懶CEO身家56億

「少返工仍有高增長叫成功」

據內媒話，陳大年以前喺盛大嗰陣，阿哥陳天橋係公司主腦，西裝骨骨喺台前負責盛大整體嘅布局和戰略，佢就負責寫代碼，抖都唔敢抖。直到有次佢加班加到暈低，幾乎命都無埋。之後，陳大年喺WIFI萬能鑰匙唔再敢爆OT，每日淨係工作六小時，更極端到做埋史上最懶CEO。

陳大年嘅做事方式曾令投資人質疑佢掂唔掂，佢話：「當你見到一家企業嘅老闆成日唔返工，但公司仍保持高速增長的話，其實你唔應該焦慮，應該高興。因為咁先至係一家成功嘅企業。」

鼓勵員工多創新 唔畀加班

佢鼓勵員工勤於思考，要多創新，唔係搏命做，又規定員工返朝九晚五，每周開工五日，唔准加班，其他員工福利仲有農曆新年年假30天等。

其實佢早年喺業內並唔起眼，只係自學編寫遊戲程式嘅中專生，反而阿哥陳天橋，即係盛大另一位創始人，復旦大學出身，曾為胡潤百富榜中最年輕嘅中國富豪榜榜首，目前身家83億人仔，個名夠晒響。

直至陳大年離開盛大後，創立免費上網和內容服務工具WIFI萬能鑰匙，即刻喺內地爆紅，成功響朵。依家WIFI萬能鑰匙嘅全球下載次數突破9億，最新估值逾50億美元（逾390億港元）。

余絲韻