Market Insight:內房股買大唔買細

上周都算係多事之「周」,美國延遲加徵中國關稅的死線、美國與北韓領導人未能簽訂協議,還有係MSCI將A股的納入因子從5%上調至20%。至於正在召開的兩會,會否有刺激經濟措施出台,就要拭目以待。

恒指上周五收報28,812點,全周計下跌4點,但港股日日成交都能維持在千億元樓上,明顯反映出股市投資氣氛好轉。尤其是港股一月及二月基本上都算出現過調整,近日只不過見到部分重磅股橫行整固,而內險及中資券商股抖完一輪,又見有起動迹象,睇落資金仲係留在魚缸內炒作重點板塊機會較大。

A股ETFs可逢低吸

講番MSCI增加A股比重後,其實唔單止被動型基金要買貨,相信連主動型基金都要逼住入貨,皆因驚住會跑輸畀行家同大市嘛!所以近期見中港股市成交同樣大增,相信係有醒目錢先行押注睇好未來外資買貨規模持續增加,博AH股一齊水漲船高。

講起成交,內地股市轉旺,如果覺得中資券商股短期升得太急,想穩穩陣陣亦唔介意行得較慢的話,不妨逢低吸納A股ETFs作中長線部署。

始終散戶投資A股,對股份都唔算有好深的認識,買民企又驚有爆煲風險,國企又唔知公司條數有幾多水分,且經常受國策影響,所以直接買具人氣的A股ETFs,係既簡單又正路做法,當中可留意安碩A50(02823)、南方A50(02822)、華夏滬深三百(03188)、海通滬深三百(02811)及標智滬深三百(02827)等。

另外,就算港股回氣後有力再上,都唔係個個板塊都值得追炒。好似上周五大市氣氛已算唔錯,但醫藥板塊的表現就相對失色,石藥集團(01093)跌1%,復星醫藥(02196)、信達生物(01801)及歌禮製藥(01672)等跌幅則介乎0.4至1.9%不等。

講到尾,現時並非大牛市,加上市場依舊憂慮藥品採購政策繼續以量換價,長線將持續打擊藥企盈利。基基於國家政策實非企業能夠改變的因素,故即使部分醫藥股近期有不俗反彈,惟相信大戶都係選擇趁高減持蟹貨,而並非追貨。

企業基本因素參差

除咗醫藥股,仲有一個板塊唔可以亂咁買,古勝所指的是內房股。上周內房股走勢都幾個別,有報指中國恒大(03333)計劃推出全國折扣優惠,上周五股價因而一度跌到落短期橫行區底部23.5元水平,惟集團表示折扣優惠屬正常策略,最終股價升1.2%收市。

至於發盈警的綠城中國(03900)就冇咁好彩,股價跌8.6%。相對地,幾隻龍頭內房股如華潤置地(01109)、中國海外(00688)和碧桂園(02007)則分別升1.5至3%,始終大型內房財政穩健,業績表現向有保證。基本上,若買內房股,當然以穩陣為先,買大唔買細係定律嚟!

古勝