絲絲講場：華懋CEO諗計幫長者住好啲

早前，華懋集團執行董事兼行政總裁蔡宏興粉墨登場，聯同「深水埗明哥」陳灼明，出演二次創作短片「尋找歸宿的故事」。全片旁白倣效「尋找他鄉的故事」，觀眾可以回味昔日香港老舊情懷，同時帶出老人喺住屋會遇上嘅各種問題。

明哥就覺得公共地方要加防滑地板，防止長者或小朋友發生意外。另外建議走廊做闊啲，無論街坊定長者都可以行得舒服。蔡宏興表示，自己同明哥尚算年輕，但都係時候Plan吓未來老年生活。

本身係註冊建築師嘅蔡生指，要創造出無障礙環境及住屋設計，一定要多花心思，諗吓點住得舒服啲。最後佢順帶一提，下月廿九日華懋集團會聯同香港綠色建築議會，舉辦「華懋可持續發展論壇2019」，探討點樣令香港成為長者友善及適合全齡人士居住嘅城市。

余絲韻