絲絲講場：馬斯克又闖禍Tesla曾挫3%

股東鬧爆 憂損失巨大

連一向係Tesla大好友嘅投資公司Gerber Kawasaki行政總裁格伯，都頂唔順馬斯克經常喺Twitter亂咁噏，話馬斯克嘅行為招致公司及股東巨大損失，仲話希望有人可以沒收咗馬斯克部手機喎。

其實過去超過六個月，Tesla股東都要為馬斯克喺Twitter嘅推文以及佢同監管機構嘅緊張關係提心吊膽。舊年八月，馬斯克喺Twitter話考慮將Tesla私有化並且已經攞到融資，引致股價波動，搞到SEC要調查呢個推文嘅準確性。雙方最終達成和解，馬斯克同意放棄主席職位並支付罰款，但佢之後仍不時隔空單打SEC。

涉違反和解協議條件

到上周，馬斯克推文話Tesla今年會生產大約50萬輛車，幾個鐘後又話只會付運約40萬輛車。SEC於是認為馬斯克違反舊年和解協議條件，當時條件係要馬斯克喺公布任何可能影響股價嘅訊息前，要先獲Tesla高管批准。

馬斯克隨即反擊，發推文話SEC睇漏咗佢喺一月底業績發布會上，已經表明今年可望付運35萬至50萬輛Model 3。馬斯克昨日再喺Twitter引用評論，話SEC嘅監管「有破損」。SEC提交嘅法庭文件中，亦包含Tesla外部法律顧問解釋信，話雖然有關推文未獲獨立批准，但馬斯克相信推文內容早已獲審批並已經公開傳播。

最重懲罰需踢出公司

於特拉華大學研究企業管治嘅埃爾森指出，馬斯克面臨一系列懲罰，最嚴重係可能被禁止營運Tesla或任何其他上市公司一段時間。他直言，企業舵手捲入官司係相當壞嘅一件事，尤其係馬斯克呢頭同SEC達成和解只有幾個月，嗰頭又重蹈覆轍，簡直令人難以置信！

余絲韻