Market Insight：創科染藍有力再升

昨日最重要的啟示，係滬深兩市成交合共逾一萬億元人民幣，創逾三年以來新高。至於港股主板成交亦增至1,687億元，為去年十一月初以來最旺，睇牌面資金買貨意欲有增無減，反之淡友今轉真係完全冇運行。

貿戰受累股博翻身

事實上，今轉港股對比A股及美股，唔算升得太急，睇指數走勢係慢火煎魚格局，且資金押注都仲未算全面，起碼較弱勢板塊如教育及醫藥股等都唔算彈得好多，顯示投資者繼續有策略地買貨。

部署上，今轉市場主要炒中美貿易戰能開花結果，所以除受惠投資市場轉旺的內險及中資券商股外，亦可以留意番貿易戰相關受累股，一於博跌得深時彈得勁，當中包括出口、航運及科技股等。不過，現時的策略只係建議吼行業龍頭或鑊氣較濃的個股，皆因若然今轉港股真係轉勢，估計基金大戶要買貨都係捧龍頭先！

反之，早前受惠避險需求上升的板塊如公用股、REITs、本地銀行股及內需股等，若持貨已有利潤在手，不妨減磅或食胡，將資金轉去上文及前景較佳的板塊內。當然，如果早前已轉為全數揸現金的投資者，講真港股彈到現水平，都無謂再同大市鬥氣，似乎係時間要諗諗會唔會順勢而為買貨！

上周中美談判期間，傳出美國要求中國不能藉人民幣貶值以抵銷美國加徵關稅的影響，消息一度刺激人民幣匯價向上，並帶動以人民幣作主要收入的中資航空股，中國國航（00753）、東方航空（00670）及南方航空（01055）昨日均裂口高開，惟前兩者臨近尾市升幅收窄，最終僅升1.2%及2%，南航則大升7.2%收市。既然今轉講到明係炒基本面好轉，值得揀番隻逢低吸納，最多跌穿10天線止蝕，風險有限。

大行睇好 不妨跟車

此外，作為全球電動工具及地板護理工具的大型生產商創科實業（00669），將於三月十一日起正式染藍成為恒指成分股，取代被剔出的華潤電力（00836），該股昨日升6.6%報50.75元，表現唔錯。從基本面睇，創科染藍應可增加市場關注度，加上集團為中美貿易戰的受累股之一，今期市場焦點為憧憬談判有好結果，且花旗亦發表報告，預期指數基金將吸納該股以平衡持倉，所以單係咁睇，股價有足夠理由炒上。

簡單而言，如果港股後市仲係咁旺，相信創科喺「入藍」前，有機會突破52周高位，不妨細細注上車跟走一轉，目標價先睇55元，跌穿49元止蝕。

古勝