港股走勢梅花間竹，昨日恒指再現反彈，最終升285點收報28,514點，主板成交增至1,086億元。
昨日市況有幾點值得留意，首先港股午後又係無力，且波幅進一步收窄，再考慮到周二都係先高後低走勢，反映市場上升動力主要都來自過夜盤，即市升幅其實有限，投資者如果早市買貨，又唔揸過夜的話，隨時又係「啱邊輸錢」。
其次，市場押注中美貿易談判結果正面，若真係傾得成，加上恒指10天線約28,217點，快將上破250天牛熊分界線約28,305點而出現黃金交叉，在基本因素配合技術走勢好轉下，港股短線爆上的機會確實存在。所以現階段就算唔買，都唔好沽，事關睇番上一次即一六年七月恒指出現同類型黃金交叉，恒指與之後高位計就足足累升萬二點，所以真係唔講得笑！
板塊走勢正如日前所言，除非有新國策出台，否則延續「慣性方向」發展機會頗大。昨日乳業股就受惠於內地提出奶業振興行動刺激，現代牧業（01117）、蒙牛乳業（02319）、莊園牧場（01533）及原生態牧業（01431）昨日升幅分別達3至12%，不妨從中尋寶。
睇番中央《一號文件》提及實施奶業振興行動，包括加強優質奶源基地建設，升級改造中小奶牛養殖場，實施嬰幼兒配方奶粉提升行動等，均有利行業發展。
如果從基本面分析，內地實體經濟受中美貿易戰打擊，中央致力維穩，便要從內需及基建等可控範圍着手。同時內地人口紅利競爭優勢漸失，估計未來或有進一步放寬生育的政策出台，行業前景轉趨樂觀。
策略上，建議選作為龍頭的蒙牛以及近期鑊氣較濃的H&H國際（01112），兩者往績市盈率分別約39倍及26倍，唔算太平，但勝在基本面穩定，仍值得吼位吸納。
另外，如博香港消費市道離底不遠的話，可關注六福集團（00590）一類的金飾股。六福息率4.4厘，估值吸引，近期股價呈圓底上升形態，同樣可小注怡情。
古勝