絲絲講場：職場轉運要識五大秘技

首先，就係要訂下長遠嘅目標。年尾有唔少人攞咗花紅或雙糧，係時候檢討現時工作情況，人力資源顧問公司Robert Half香港執行總裁Adam Johnston話，當大家忙於應付手上工作時，往往容易迷失長遠事業發展方向，建議要重新計劃職業生涯。

仲有，依家好多僱主會透過社交平台將求職者「起底」！所以第二招就係要認真審視及更新資料，將自己最正一面呈現畀未來老闆。Johnston更提醒，如果自己嘅社交媒體上有敏感內容，最好隱藏或修改，避免因而錯失求職機遇。

第三，就係要喺新一年努力建立人際網絡！雖然有唔少人怕應酬，覺得公餘時間被剝奪，但Johnston強調，大家永遠無法預知自己嘅人脈關係幾時會大派用場，甚至帶來發展機遇，所以不妨趁新年與業內專才聯誼，亦可以多聯絡番啲舊朋友同埋舊同事。

修讀課程 自我增值

第四招，就係要學識新技能，正所謂「知識就是力量」，修讀課程增進知識，實行全面自我提升，就算「輸在起跑線」，都仲有機會跑出。不妨考慮學門外語，或者接觸區塊鏈（BlockChain）、人工智能（AI）同虛擬銀行等呢類新科技趨勢。

最後係要懂得休養生息，工作與生活平衡相當重要，能夠幫助集中精神同保持積極心態，Johnston話，打工仔好應該盡情享受農曆新年假期，完全唔需要內疚。

余絲韻