絲絲講場：雷蛇忠粉生B改名「Razer」

話說，唔少家長生小朋友時，諗名都諗到頭爆！有意思之餘，分分鐘要排埋字輩。相信風水命理嘅，要再夾埋時辰八字。但有個新任媽媽Anne實行自己鍾意乜就叫乜，佢係電競品牌雷蛇（01337）忠實粉絲，鍾意到將自己個BB改名做「Razer」，咁就可以無時無刻都有Razer陪喺佢身邊。

中國人有句說話「唔怕生壞命，最怕改壞名」，不過呢，Anne係位菲律賓媽媽，應該百無禁忌，佢仲Show埋佢個Razer B張出世紙畀雷蛇睇，以示有幾堅。

獲贈電競手機陪坐月

得粉絲錯愛，雷蛇行政總裁陳民亮唔單止喺社交網站分享呢個消息，仲決定送部電競手機Razer Phone 2畀Anne坐月時打個夠，順手可以記錄埋Razer仔成長歷程。Razer仔第日大咗，怕且一定會講句多謝晒。

雷蛇出名忠實狂迷多，啲Die Hard粉絲將雷蛇Logo紋上身不單止，仲有人將陳民亮個樣紋喺小腿度，遲啲會唔會有姓「雷」嘅粉絲，將自己個B改名做「蛇」呢可？今時今日啲父母，真係話唔埋！

余絲韻