今天就是「立春」，按傳統曆法，立春起新、舊太歲正式換班輪值，己亥豬年開始。投資者爭取在投資市場上「諸」事順利，當然不少得在新年伊始作好部署，古勝今期就提供四招策略，期望大家今年旗開得勝！
要預測豬年投資法，先講吓豬的第一個「特性」，就是不好動，持盈保泰！所以豬年投資第一招，就係以靜制動，投資忌急進，也許全年耐心睇準幾個入市點捕捉炒幾個大浪，比日日炒出炒入消磨意志為佳。
由於美國加息周期即將完結，美元難復強勢，資金流開始由美元區流出以尋找落腳點。每逢全球資金乾坤大挪移，金融市場必定會有大波動。市場愈波動，意味有波幅可炒。投資者宜耐心等候負面消息出盡，技術指標出現超賣時才分注入市，待市況反彈，平倉食胡。
近季內地多處爆發「非洲豬瘟」，疫情尚未受控。豬年的投資組合亦要首重防守，確保有足夠的「免疫力」，應對大風大浪。
實際做法是，持有一定比重的現金或固定投資收息，畢竟今年金融市場可能會頻爆黑天鵝，投資者記得此時絕非「全副武裝」短打的適合時候，更要提防高負債股尤其是民企股會頂唔順出事，故千祈咪博一注獨贏，隨時被人當「豬」咁劏！同一板塊，還是以國資背景的企業列為首選，至少有國家做大股東撐場，有咩風吹草動，唔會冇得翻身。
正正由於預期今年指數仍然會有大幅波動，重磅股全年波幅都會幾大，所以要捕捉大浪，就要主力從市值同流動性分量十足的重藍籌股着手，總之唔大唔好揀，首選當然係隻騰訊控股（00700）。
雖然騰訊近30倍市盈率仲未算係好平好抵，但估值水分已蒸發不少亦屬事實，加上網遊行業已恢復審批，騰訊唔應該睇得太淡。雖然今年股價未必能重遊高位，但論絕對值相信會較狗年表現有進步。
今年5G會是一個熱炒題材，加上主力做內地市場，未受外部貿易戰的直接影響，建議關注中國移動（00941）。
豬的一個鮮明形象，是懶惰，但其實豬是相當聰明，懂獨立思考，具備自行解決問題的能力，且具樂天積極的特性，只是興趣可能在「食」方面。豬年投資，須謹記要理性地「懶惰」，即少炒出炒入，且減少投資門類貴精不貴多，重點出擊，這也方便提升風險管控的效率，以應對金融市場的急劇變化。
謹記豬年想在魚缸坐「順風車」搵食並唔容易，分分鐘坐上「跳樓機」而不自知，選股要求早着先機，做到眾人皆醉我獨醒。大牛市就話合埋眼揀股求其一隻都贏錢，熊市要爭取跑贏大市的回報，選股同入市時機是致勝關鍵，別做「豬」一般的隊友，下下等反彈咗一段路先高追，後知後覺好易接火棒！
古勝