Market Insight：臨近春節長假 無謂咁博

恒指成分股普遍欠缺表現，不過仍有部分藍籌大隻佬微升，好似騰訊（00700）昨日升0.2%，滙豐控股（00005）升0.1%，建設銀行（00939）升0.5%，睇落氣氛唔算好差。

另外，一月期指今日結算，而下個星期一因年三十晚關係，只得半日市，所以計落狗年只係剩番3.5個交易日。照理市況應該愈來愈悶，但成交仍未見大縮。其實講到尾，今個星期尾段港股走勢，似乎都好睇中美雙方於第二輪貿易戰談判後有乜嘢新進展而定，短期入市做好或做淡，其實勝算都唔高。

鐵塔整固完可再上

相反，部分板塊方向就較指數明確，好似發改委最新發文指，將加快推出5G商用牌照，支持有條件的地方建設信息消費體驗中心。由去年尾炒到今年初，其實5G概念股就一直炒個不停，好似中國鐵塔（00788）股價自去年十二月初近1.2元樓下，一直反覆升至一月二十四日高見1.76元後整固，昨日雖跌0.6%收報1.64元，惟仍守穩10天線1.61元，相信整固完成後可以再上。

此外，通達集團（00698）公布經已完成5G天線振子的研發，已就應用於5G主流大規模多輸入多輸出天線（Massive MIMO）完成對雷射直接成型（LDS）、塑膠電鍍（POP）的基站天線單機應用的研發。現時已為多位主流客戶訂製模具，預計第二季度可進行小批量生產。

消息公布後，即見資金湧去追炒通達，其股價昨日由到升到尾，最終大升41.5%報1.09元，日線圖呈一支巨大陽燭，喺上晝幾時買入都有得贏。

不過，一日升逾四成，今日仲可唔可以再衝多浸，睇怕機會真係唔大，始終下周就放農曆新年長假，資金可能選擇食胡先。所以如果已持貨者，要貼市少少睇實走勢，隨時準備止賺。至於未持貨者，其實都無謂咁博啦！

車股前景仍難樂觀

國家發改委雖然重點促進汽車消費，但汽車股作為貿易戰主角之一，加上中美就算傾得成，但內地汽車產業仍需要面對持續開放市場，外資進場引發的行業競爭，前景點計都唔算好樂觀，所以板塊每次的反彈，其實都係減磅機會。

長城汽車（02333）、廣汽集團（02238）、華晨中國（01114）及比亞迪（01211）股價昨日跌幅介乎1至4.4%。至於遭大摩續唱淡的吉利汽車（00175）亦跌4%，可見板塊無論基本因素及投資氣氛皆偏淡，短期不宜有過高期望。

古勝