絲絲講場：證監總部研搬鰂魚涌

唔通近年辦公室流行無特定座位嘅開放式設計，方便員工交流同互動，所以證監會都要研究吓？

2022年約滿 可提早遷出

傳聞就言之鑿鑿，絲絲梗係第一時間向證監會求證，但發言人只係話，證監會租約將會喺二○二二年約滿，並可於二○二○年提早搬出，佢哋喺研究中將考慮所有方案。

據悉，證監會唔排除仲討論緊租約嘅細節，所以仍要待完成簽約先會正式落實。其實證監會搵顧問研究辦公室安排已好一段時間，早前預期今年中會有決定。

新辦公室共九層 涉20萬呎

而證監會下個月就要去立法會財經事務委員會交代新年度嘅預算案，相信辦公室安排肯定係議員關心嘅議題之一。

講番今次搬辦公室，證監會計劃租用嘅樓面好大，佔九層，涉及大約20萬方呎，咁啱有一家投行將會搬出港島東中心，所以騰出多層樓面，畀證監會租用。

當然，最終安排要等證監會正式公布，不過，依個消息對於證監會員工，肯定係喜多於憂，事關依家好多大型機構，都搬出好似中環、金鐘同灣仔等核心地區，大多係選擇觀塘、九龍灣，甚至黃竹坑，所以如果落腳喺鰂魚涌，都算非常方便，話晒都係喺港島區，唔係專登過海返工！

余絲韻