絲絲講場：樂高美泰鬥「玩」嘢

集合奇人度橋 接通手機

樂高點解咁成功？近日外媒就披露原來佢全賴公司嘅最高機密機構─未來實驗室（Future Lab）。喺每年九月，約50名對兒童玩玩具行為有長達十年研究嘅樂高未來團隊隊員，會到西班牙地中海沿岸一個小鎮嘅酒店泳池旁嘅書籍室開會，進行24小時無間斷嘅腦震盪馬拉松。

團隊中人包括時尚索女、愛穿超級英雄Tee嘅技術員等。佢哋本身係人類學研究人員、營銷人員以至建築師等。

踏入今年，樂高其他部門繼續圍繞既有生產計劃，製造潮爆玩具。而未來實驗室嘅任務就係將遊戲世界更數碼化，而團隊進行中嘅一個項目名為One Reality，強調新穎嘅混合數碼物理樂高體驗，通常喺手機、平板電腦或電腦上運行軟件，體驗積木遊戲。

韓男團公仔傍住Barbie

而美泰玩具今年亦有新部署。據外媒爆料，今年美泰嘅王牌玩具芭比娃娃（Barbie）將加入新朋友，就係嚟自南韓嘅男團「防彈少年團」（BTS）。美泰透露，將會推出BTS嘅玩具公仔、珍藏版首辦模型公仔及遊戲等。

BTS係南韓現今最當紅嘅男子7人少年團，團隊身價料超過280億港元。當美泰透露將生產BTS玩具後，股價周一升7.7%，昨日早段再升逾4%。睇嚟，美泰今年食粥食飯都要靠BTS。該公司去年股價大跌35%，前年更跌44%。