絲絲講場：財圈過聖誕 最緊要「友」Mood
今日聖誕節，絲絲祝各位讀者Merry Christmas！人人過一個開心快樂聖誕節！講開點樣過節，絲絲都問咗唔少財金圈中朋友有咩慶祝活動，有人選擇外遊，亦有人揀喺香港慶祝，總之各適其適啦。
豐盛金融黃國英就話，連續兩年聖誕都離開香港去外地旅遊。而今年就打算同屋企人連埋幾個好友，坐郵輪遊上海再去日本。
買禮物絕冇縮水
騰祺基金沈慶洪就會同屋企人去澳洲，過一個夏天聖誕，未計雜項，大概預萬零兩萬蚊玩。
唔想舟車勞頓，亦可以好似瑞萬通博「輪后」葉文炘咁，留喺屋企煲吓劇，佢話同朋友交換吓禮物已經好開心。佢覺得兩日假期有啲短，都係留番喺香港休息，同埋平時積積埋埋咁多劇同電影冇睇，依家就係時候清一清。
志昇証券麥嘉嘉亦選擇留喺香港，但佢就將會好忙喇！事關成個假期日日都有約，要同朋友開Party喎！佢話，雖然今年股市整體麻麻，但係買禮物方面係冇縮到水！
瑞信何啟聰亦冇諗住去邊度玩，佢話喺香港都係同朋友聚會，至於禮物就好少買喇，多數互相貢獻吓啲嘢食咁啦！
余絲韻