絲絲講場：做足21年港交所 李國強月底退休

李國強榮休後，集團營運總裁一職將由戴志堅個人擔任。喺搵到合適人選前，戴志堅亦會暫時擔任市場主管。換言之，戴志堅暫時會戴「兩頂帽」，即係市場同結算主管。

李國強係港交所名副其實嘅「老臣子」，一九九七年加入港交所，足足做咗21年！佢做過多個部門，好似現貨市場、資訊技術、上市營運事務、結構性及定息產品等，舊年先升做聯席集團營運總裁，亦係現時港交所少數嘅港人高層之一。

財匯局潘祖明月中卸任

港交所近年高層人事變動多得好似「車輪轉」。之不過，離開港交所嘅高管都好快喺市場搵到新工。除前監管合規主管關蕙，現已加盟加密貨幣交易所Bitmax做營運總裁外，喺港交所做咗13年、負責內地企業來港上市培育同推廣工作嘅前上市發行服務部高級副總裁鍾創新，亦已加入小i機器人出任首席財務官！

另一邊廂，主力負責監督港交所交易及結算活動嘅香港證監會市場監察部執行董事雷祺光，亦屆退休年齡，今年中佢只續約一年，任期至明年。證監會最近已刊登招聘廣告請其接班人！

講開又講，財務匯報局主席潘祖明亦於本月中正式卸任，由黃天祐接替其職務。潘氏任內財匯局已逐步過渡至新監管制度，可算為佢6年主席生涯畫上句號。

余絲韻