孖妹S檔案：芬佬教點做亂市贏家
又到聖誕！孖妹每年聖誕前夕都習慣去倫敦Shopping兼食好嘢。今年恒指升至高位33,484點後就冇行過好運，我哋喺股場上都輸咗少少錢，所以今次唔坐頭等，只好降Grade坐吓商務客位喇！倫敦係國際金融中心，一場嚟到梗要同當地芬佬傾傾，我哋就參加咗一個大型國際投資Talk，並向多位各自管理數十億元資金嘅芬佬攞料，估算吓明年環球金融市場走勢，為劈炮唔撈做準備！
甘：施羅德亞洲（日本除外）股票產品聯席主管 甘卓亨（Stephen）
A股：資金追捧 抵買值吸納
Kitty：今年年中，A股納入MSCI指數系列，市場稱之為「入摩」，但之後又唔見大升喎，幾時先有運行？
甘：目前A股有3,397隻，總市值接近7萬億美元，但喺全球投資組合及MSCI指數佔比都比較低。我認為，未來全球佔比會慢慢提升，大家都睇到喇，內地嘅經濟增長上升，都係吸引國際投資者買入原因之一。而A股將由只佔MSCI指數5%，逐步調高至20%。我哋認為目前A股仍屬抵買，可考慮吸納。
電動車消費板塊看俏
彩兒：有乜推介板塊？
甘：內地好多行業有發展空間，當中特別睇好四大板塊，包括電動汽車及相關零件、消費股、中國白酒股、科技及高端製造股。事實上，中國人消費能力高，消費股長遠增長空間幾大。
另由於A股納入MSCI，因此有大量資金正流入市場，同時投資範疇亦多樣性，都令國際投資者產生興趣。雖然今年首十一個月滬綜指跌約21%，但相信仍有大量資金陸續流入，反映外國投資者反應熱烈。
Kitty：雖然咁講，但A股明年又面對咩挑戰呢？
甘：當然係近日嘅中美貿易摩擦，有機會打擊消費者信心，以及中國與外資企業合作，從而影響A股走勢。另外，人民幣政策上嘅限制以及匯率貶值都會影響投資者入市意欲。而且政策、監管、法律及會計等風險都係內地投資嘅擔憂。
新興市場：美元愈強 貨幣愈唔穩
彩兒：土耳其里拉今年跌咁多，再跌咪可以嚟個超平價之旅？
Kirsty：去年新興市場推行量化寬鬆政策，相反美國進行貨幣緊縮政策，以致美元轉強。美元愈強，新興市場貨幣就愈唔穩定。去旅行就一定抵，以今年首十一個月為例，土耳其里拉兌美元跌咗27.07%，阿根廷披索都跌近半成！
Kitty：咁兌多啲里拉，明年去土耳其坐熱氣球先！但做投資好嗎？
Kirsty：明年走勢較難預測，你知啦！早前中美貿易戰進行得如火如荼，受影響嘅國家唔止中美雙方，而係全球，亦包括新興市場國家。坦白講，美國總統特朗普經常反口覆舌，真係好難預測佢會點樣再有進一步行動，唯一可以肯定嘅係，我哋深信25%關稅勢在必行，只係睇吓幾時！
估值料仍比歐洲吸引
彩兒：中美貿易戰好壞對新興市場有咩影響？
Kirsty：影響就大喇！其實新興市場仲有好多發展空間，以及投資嘅可能性。但由於中國與其他新興市場國家有許多貿易關係，一旦中國經濟有危險都會連累到其經濟增長。雖然中國政府亦因此進行一系列措施去刺激經濟，但都會令內地製造業投資者卻步，而廠家又會考慮應否搬廠至其他東南亞國家等。
Kitty：新興市場仍值得投資？
Kirsty：中美貿易戰令兩方經濟長期放緩，我哋預計明年環球經濟增長會由3.1%下調至2.9%，中國經濟增長今年會維持6.2%，但至二○年就會放緩至6%。另估計美國經濟增長會放緩至2.4%，歐元區經濟增長將會放緩至1.6%，新興市場亦會放緩至4.5%。不過，新興市場估值仍較歐洲吸引，今年新興市場的盈利增長14.9%，歐洲為7.4%。
商品市場：Chok過今年 油金看升
彩兒： 你點睇一九年嘅商品市場？
C W：我哋幾睇好明年商品市場前景，不過估計市場會比一八年波動。始終環球市況唔穩定，例如中美貿易戰局勢較緊張，對產品價格影響最大。
Kitty：咁點投資好啊？近期買鑽石都買到手軟，買啲黃金又好唔好呢？
C W：我哋估計，明年石油及黃金價格一定會回升，黃金價格幾受投資者情緒波動所影響，目前美國嘅經濟增長放緩，加上通脹上升、加息步伐有機會減慢，都係令到黃金價格上升嘅因素。如果你有足夠資金，建議入多少少貨！
彩兒：近期油價跌到驚，明年會唔會繼續跌，阿爸入油又平啲？
C W：雖然近來油價慘跌穿每桶50美元關口，但由於有持續性需求，加上未來仲有機會減產，所以一九年油價必然持續上升。
多元化基金相對穩陣
Kitty：你有咩投資建議畀番我同彩兒呢？
C W：其實買入商品主要係要防止通脹帶來嘅影響，而且同金融資產相比，商品嘅價格會比較便宜。不過點都好啦，投資者應該選擇多元化基金，千祈唔好投資單一同埋高風險嘅商品啊！
港股波動屬入市良機
孖妹去完轉倫敦，諗來諗去都係覺得差啲嘢。無錯！就係未講到大家關心嘅港股，所以我哋再搵專家幫忙，為明年港股命運把吓脈。
Eric：普信亞洲機遇股票策略基金經理 Eric Moffett
彩兒： 點解今年港股搞成咁，基金表現會點？
Eric： 港股一八年表現較遜色，主要受中美貿易戰影響。按市場表現而言，台灣及韓國最受美國出口影響，第三先係香港。今年首十一個月MSCI香港指數跌咗10%，最明顯係喺香港上市嘅中資股。加上內地股市投資氣氛唔太好，都影響香港市場嘅投資信心。
優質金融股睇高一線
Kitty：明年買咩板塊好？請為小妹指點迷津！
Eric：一七年港股表現比較出色，相反一八年投資者比較謹慎，而股市調整並非多數企業盈利出現虧損，是由於貨幣轉弱等等市場因素所致。就我哋嘅角度而言，市場波動就係入市良機，當中會睇好高質素以及全球化嘅金融及消費股，因為可以受惠於內地消費增長，又可以對沖美國聯儲局加息影響。
另外，我哋亦持有部分香港電訊公司。至於揀股票方面，就傾向一啲創新行業龍頭或受惠於國企改革嘅公司，當中必須要有良好嘅基本因素而且現金流充足。
彩兒：咁會唔會有黑天鵝呢？巧驚驚！
Eric：我哋相信香港及其他亞洲市場，將會受到中國經濟放緩及中美貿易談判影響。另外，展望一九年，部分上市公司已透露企業盈利前景不佳，大家要注意！
彩兒、Kitty