Market Insight：金融板塊暫宜忍手

先講美股，道指上周五再跌多558點，全周挫1,149點或4.5%；標普500指數累跌2.3%，創三周最大跌幅，50天線跌穿200天線現「死亡交叉」。科技龍頭股蘋果公司股價較十月初高位累挫27%，市值蒸發逾3,000億美元，就咁睇牌面，有錢都唔會衝入去買美股啦！

港股亦唔好得幾多，恒指全周累跌442點或1.6%；國指則累跌252點或2.3%，睇跌幅係就係少過美股，最慘係港股跌先過美股！

從基本面睇，港股早前反彈，主要都係靠隻騰訊（00700），惟騰訊累升不少後，上方330元前開始見阻力，加上資金轉炒美國加息速度減慢甚至停加，一眾早前受惠加息周期的國際金融股上升動力亦見減弱。

內銀內險同樣失色

最明顯係滙豐控股（00005），事關淨利息收入條水喉間接被收窄，加上美國經濟前景好大機會逐漸轉淡，上周股價更一連三日跳崖式下跌，自十二月初起至今呈三個下跌裂口，且三支陰燭皆低開低收，後市真係見唔到曙光，無乜事都唔好衝去接跌下來的刀！

相對地，友邦保險（01299）股價叫做冇咁差，上周五亦跌0.2%報63.05元，同樣呈穿頭破腳的利淡形態，睇怕短期內都難以再向上挑戰65元阻力，又係可以放埋一邊。

國際金融股唔買得住，咁中資金融股又如何呢？先睇內銀兩大龍頭，建設銀行（00939）及工商銀行（01398）上周走勢都係級級落，兩股均已跌穿短期上升軌支持，走勢利淡。睇落就算人民幣大幅貶值機會減弱都幫唔到幾多，事關市場愈來愈擔心中央力撐民企，要內銀積極借貸，未來壞帳上升風險日增。

至於內險股，近幾個月跌勢雖有喘定迹象，不過短期都要跟隨中港股市回軟，好似中國人壽（02628）、中國平安保險（02318）及中國財險（02328）近幾個交易日都以反覆向下為主。基本上，A股走勢唔多靚仔，要內險股靠自身營運數據向好而支持股價表現，確實有點難度。既然氣氛唔就，就算看好板塊前景，暫時都係忍手為妙。

不利因素困擾港股

現時部署方面，古勝早前講過，港股要再上一層樓，除騰訊發力外仲要一批中資金融股幫手，否則再上必有難度。豈料如今港股狀況是騰訊高位見阻力外，中資同國際金融股都幫唔到忙，咁港股亦自然推唔上。

反而最擔心的是，外圍市場對貿易戰以及美國經濟前景的憂慮有上升之勢，在內憂外患下，看官宜慎防港股未來會重拾跌浪。

古勝