絲絲講場：深圳A股欠債肉償？
欠債唔一定還錢？原來喺內地，無錢還債，可以攞各式各樣嘅物品嚟還債？最新例子就係內地深圳A股雛鷹農牧（002477.SZ），喺深交所發通告，話受非洲豬瘟疫區封鎖、禁運等因素影響，公司生豬等相關產品短時間內難變現，為盤活庫存、緩解當下現金流緊張局面，竟然諗咗一條絕世還債好橋！
火腿代息 股價竟漲停
公司擬對現有債務調整支付方式，本金主要以貨幣資金方式延期支付，利息部分主要以公司火腿、生態肉禮盒等產品支付，債務範圍包括公司現有所有債務。咁咪名副其實嘅欠債「肉償」，不過係指豬肉……
該公司指，上述僅為初步方案，正與各債權人協商。截至公告日，公司已經與小部分債權人達成初步意向，涉及本息總金額2.71億元（人民幣‧下同），目前尚未進行產品交割。
雛鷹農牧昔日被業界譽為「中國養豬第一股」，但面臨資金緊張，近日已曾公告5億元債務違約。周五股價卻衝高漲停，停牌前報1.91元，升咗近一成。
其實以上內企無力還債嘅例子係冰山一角咋！今年以來，內地企業信用風險上升，已爆出多單債券違約事件。據財匯金融最新數據顯示，年初至今已有89隻債券違約，涉914.56億元。當中債券違約嘅主體約80%係民營企業。
至於內企用實物還債有幾咁奇葩，據悉，除上述嘅「肉償」，亦曾經有過用大蒜、樹木、機票、珊瑚等物品來還債等個案。但令人驚訝嘅係，有業內人士話，呢種實物還債方式，或者係最好嘅結果！
余絲韻