孖妹S檔案：心動炒新股？睇清6形勢

陳：輝立証券經理　陳英傑

聶：富途證券分析師 　聶振邦（聶Sir）

張：信誠證券聯席董事　張智威

林：國農證券董事總經理　林家亨

富途聶振邦估計，明年新股上市數目會明顯減少。	國農林家亨表示，炒新股只宜小注。	輝立陳英傑稱，炒新股要留意暗盤價。

市場氣氛 明年掛牌數目恐銳減

彩兒：市況好，炒新股較着數，究竟係唔係？但十月個市咁差，新股反而炒起，莫非有「股怪」？

Kitty：我都覺得奇怪，市淡仲上市，唔驚集資額遠低過預期？

聶：由遞交上市文件至批核過程需時半年至九個月，所以今年至今新股上市數目比上年多，全因公司喺上年第四季或今年首季已遞交申請上市文件，當時市況仍OK。到今年批咗，雖不幸遇上市況差，但好少公司會拒絕上市。今年煞停上市嘅公司唔多，當中包括OCC Cables（01791）等。惟我估計明年新股上市數目會大為減少。

Kitty：股價好大機會谷唔高，但佢哋都頂硬上！

彩兒：咁又未必！十月上市嘅新股表現不俗，當中廣駿集團（08516）上市至今爆升超過兩倍，亮晴控股（08603）及MINDTELL TECH（08611）爆升逾一倍，但MINDTELL TECH中籤率僅14.5%，若抽中就好啦！

Kitty：咁啱三隻都係創業板股。

聶：其實我覺得市值低、上市市值十億元以下嘅細價新股，依家仲有得炒，大家可以諗諗。

彩兒：期望炒新股仲有一線生機啦。

信誠張智威稱，個別新股有星級基投，但股價仍插水。

十月中至今掛牌新股表現

注碼投放 認購金額宜兩萬樓下

彩兒：遇上淡市，新股就會少人爭，如果你獲派大堆貨，就弊傢伙！

聶：抽新股，真係唔知會分派幾多，若財力麻麻，認購金額宜維持兩萬元以下。而抽新股前，要留意認購情況及市況，若覺得值博，可於暗盤買入，且買入價最好喺發行價附近。

林：無錯！真係要炒都只宜小注。抽新股有約7日凍資期，若市況好，固然沒問題；但若招股期市況轉差，投資者憂慮後市，新股可能喺暗盤及掛牌當日出現沽壓，令股價受壓，投資風險大增。

炒新股隨時贏粒糖，輸間廠。因國際配售嘅認購倍數隨時有變，投資者可以抽飛。但公開配售新股入咗飛，基本上就無得轉身，若大手入咗，但股價上市急挫，就輸得好甘。

Kitty：落咗場就焗住玩，但早走都得啩？

聶：若累計成交額喺短時間內等同招股規模，咁好可能大戶離場，建議投資者都跟住走。另外，若見股價升一倍，安全起見，沽一半先，攞番個本，其餘嘅就留喺度繼續博。

市值解讀 大價細價炒法各不同

聶：市旺嘅時候，大價或細價嘅新股炒作空間都大。不過，最近幾個月市況轉差，短炒細價股就適合啲。

Kitty：炒大隻同炒細隻嘅新股，有咩唔同？

聶：炒大價新股方面，若上市前基礎投資者嘅成本價較招股價折讓五成或以下，亦具備良好業績前景及盈利能力，可考慮買入。至於炒細價新股，唔使睇佢做咩，或者前景如何，因都係短炒為主。

彩兒：其實，細價股係咪個名要夠響，同埋係散戶愛股先好炒？

聶：錯！被散戶追捧，同值唔值博，係兩回事。若見新股認購情況理想，即多散戶入場，就要配合大市氣氛。若氣氛差，上市沽壓可能幾大，股價隨時跌穿招股價。不過，若招股結果差，但大戶持七成以上股份，該股可能更值博。原因係主要大戶持貨，相信佢哋唔會喺股價低過上市價時走人。

Kitty：好！淡市一於跟大戶炒，有少少肉食，我都滿足喇。

集資金額 睇分配比例揣摩走勢

彩兒：一般較細隻嘅新股，集資額都較少，炒風自然勁啲。

張：另留意公開發售及國際配售分配比例，亦會發現，喺市場上可買賣嘅股份貨源愈歸邊，股價就更易炒上。

陳：最近見超額認購唔多，無回撥，但佢哋喺二手市場嘅表現唔錯。公開發售比例，通常係90%配售，10%公開發售。一般嚟講，若公開發售超購15至50倍，可回撥至公眾持股佔總售股數三至五成。

Kitty：邊隻上咗市嘅，仲值得追入？

陳：上咗市嘅就算喇，不如專攻未上市嘅仲好，如恒達集團（03616）。炒新股要留意暗盤價，若暗盤價升，翌日上市升嘅機會都大啲。

彩兒：恒達喺主板上市，而最近熱炒嘅則係創業板股。到底喺唔同市場上市有咩分別？

陳：創業板係一個投資風險較大嘅市場，因上市門檻較低。所以，我哋公司有提供抽主板新股按值逾5成服務，即持市值10元股票，可借入5元，但抽創業板新股就無呢個服務。然而各券商按值有別。

數據分析 計合理值 知勝算高低

彩兒：揀細價新股時，要睇邊幾個條件？

聶：若抽新股，或喺暗盤買入，就要留意以下條件，從而計算值博率：第一，招股價低過一元；第二，集資額低過一億元；第三，集資成本為集資額15%或以上。

另外，要計算每股合理值，即集資淨額、公司帳面值及殼價嘅總和，除以發行股數。若合理值有招股價嘅四成或以上，都值得抽。主板殼價逾5億元，創業板殼價逾2.5億至3億元。

Kitty：不如舉個例子吖！

聶：九月份上市嘅WAC HOLDINGS（08619）截至今年三月底，經調整資產淨值3,751.5萬元。其集資淨額，按下限價0.2元上市計，為3,915.9萬元。按一般創業板殼價估算，合理值上下值為約3.26億至3.76億元。發行股數為9.6億股，所以每股合理值介乎0.34至0.39元。

彩兒：所以該股首日掛牌就爆升逾兩倍？

聶：其實比較每股合理值及0.2元上市價，潛在升幅介乎70至95%。

Kitty：若我等佢上市後先追入，要分析乜嘢？

聶：睇招股結果，了解其貨源歸邊，例如半新股富匯建築（01034）都出現此情況，股價首日掛牌升逾43%，上市至今累升近1.6倍。

幕後財團 大戶撐腰 唔係一定升

彩兒：之前有新經濟股，跟住再有同股不同權，嚟緊有無咩好概念？

聶：暫時無。上年第四季新經濟股，如閱文集團（00772）及眾安在綫（06060），上市後股價都狂飆。不過今年就唔係咁，新經濟股上市無幾耐就跌破上市價。至於同股不同權嘅股份，普遍表現都唔好，散戶有戒心。無盈利基礎嘅生科股亦唔值得博。

張：小米有星級基石投資者，但股價插水，跌穿招股價。所以，就算有基石投資者，佢哋投資一千幾百萬元，呢個銀碼對佢哋嚟講唔算係咩。

無謂講心 唔對路即走

聶：炒新股比炒二手市場港股好，因風險較低。然而兩者嘅投資心態唔同。一般炒新股，見唔對路就會狠狠走佬；但買二手市場大價股就有種情意結，個市愈跌，愈想溝貨，點知就倍大虧損。例如香港交易所（00388）之前曾升穿300元，但依家得番227元。

Kitty：不過，有時諗投資嘅嘢新不如舊，所以就短炒個股。

林：啱呀！目前係退潮大氣候，瑞聲科技（02018）由185元跌到60幾元，舜宇光學科技（02382）由170多元跌到80元，而美股納指亦有強烈進入熊市信號。我已經近四個月無炒新股，淨係會短炒二手市場個股。

喺創業板上市無盈利要求，而上市費用一般要2,000萬至2,200萬元，公司可能一年都未必賺到，令公司虧蝕。所以，投資要注意風險承受能力，預自己買錯。我揀選新股時，會留意公司盈利能力，因為即使股價下挫，之後或有力返家鄉。

Kitty、彩兒