Market Insight：出口股料率先發力

相信無論係散戶定基金大戶，上星期唔多唔少都會入番多少貨，理由就好似螞蟻嬲蜜糖咁簡單。睇番港股今年除一月外，基本上無運行，講真全年計數如果帳面唔輸就已經跑贏大市幾條街，但係斷估去到年尾，基金點都要入番些少貨底，一來現金水平唔可以太高，二來做靚盤數，咁下年先至有得繼續玩。所以，今轉反彈浪會唔會延續落去，睇牌面似乎機會都唔細。

揀錯板塊隨時得個吉

大市氣氛雖然好轉，但都要揀啱板塊炒先至係好落場，否則一個轉向隨時又係得個吉。好似中資航空股咁，上星期就受惠人仔急彈而抽上，南方航空（01055）、東方航空（00670）及中國國航（00753）同樣升逾12%，但講到明係彈，人仔長遠貶值趨勢未變，所以都係見好要收。

至於同樣受惠人仔急彈的紙業股以及內房股，雖然上周五都升得唔錯，好似玖龍紙業（02689）、理文造紙（02314）及晨鳴（01812）都升6至12.6%不等；內房股世茂房地產（00813）、合景泰富（01813）、綠城中國（03900）則升5至6.7%不等。

不過，古勝建議，上周未有買貨者最好係眼看手勿動較穩陣，一來兩個板塊都唔見到得基本面可以有大幅改善空間，二來如果因為估值平而入貨的話，咁其實現時通街平貨，有錢何愁無貨買？

講番重點，今轉市場炒中美貿戰有轉機，當然就要搵番一堆早前最直接受累的股份嚟短炒一轉，當中主要有出口股及科技股，之前跌到冇影，故今轉反撲力必定係最強！

策略上，汽車轉向及動力傳動產品供應商耐世特（01316），北美洲收入佔比達六成；分銷電訊產品與電子學習產品及資訊產品的偉易達（00303）；從事製造與經銷電器及電子產品的創科實業（00669）亦以美國為主要市場，加埋利豐（00494）及敏華控股（01999）等幾隻傳統出口股，早前統統被貿易戰射正紅心，目前全部都可以放入優先觀察名單。

耐世特不妨小注追勢

走勢上，上述幾隻心水股份中，以耐世特及創科表現最為標青，兩者往績市盈率分別約為10.8倍及21.7倍，當中又以耐世特的估值較吸引，周五股價裂口高開後，動力唔算好強，如果可以回一回到落11元邊位至買就最好。但世事點會咁完美，既然走勢改善，小注跟一跟追勢亦無妨，目標價睇13.4元，止蝕位10.92元。

古勝