股災月一過，十一月港股開局唔錯，恒指高開249點後反覆向上，最終升436點報25,416點，國指升140點報10,279點，主板成交增至1,188億元。
港股昨日氣氛改善之餘，又真係有真金白銀買貨，舊經濟股份內銀同基建股做好，騰訊（00700）亦發威，就連弱勢畢呈的內房股都有起死回生之感。所以就算中線睇淡，暫時都係唔好用衍生工具做淡，無謂同市場力量對抗。
睇番今年騰訊跌咗三季有多，主席馬化騰一直未有表態，不過佢喺騰訊全球合作夥伴大會舉行前夕終發表了公開信，當中除重點提重大戰略升級和架構調整外，還指出以最先進技術保護好未成年人，避免不健康的消費沉迷。至於官媒周四亦發表文章，指網遊危害在於「沉迷」。
由於可見，騰訊有機會與中央就產業政策上取得默契，未來若有審批政策開綠燈消息，勢進一步帶起股價。考慮到集團股價跌幅甚深，反彈動力隨時唔講得笑，想博反彈者可以其作重點對象。不過，打仗記得要戴定頭盔，集團將於十一月十四日公布第三季業績，如果見資金炒到業績前夕有散水迹象，最緊要走得快好世界！
古勝近日提過的基建鐵路股及中資券商股都有唔錯表現，而唔睇好的內房股昨日亦借勢炒上，碧桂園（02007）升9.1%，世茂房地產（00813）、雅居樂（03383）及中國恒大（03333）都升逾8%。至於藍籌華潤置地（01109）同中國海外（00688）亦升逾4%。
今轉炒上主因是市傳內地銀行下調首套房貸利率，加上有指最近中央政治局會議未有提到房地產調控，故引發市場有放鬆的遐想。然而，內地經濟底子弱係鐵一般事實，部分房企於「金九銀十」期間更要減價套現，所以若短博反彈，建議正路揀番騰訊、基建同中資券商股。
古勝