日媒報道，九月喺香港上市嘅連鎖火鍋店海底撈（06862）及日本電機企業松下（Panasonic）成立合資公司，開發自動化餐飲設備。松下宣布，率先為海底撈北京新店提供廚房自動化器材。
海底撈即將引進嘅係松下嘅「自動配菜機械人」，當顧客使用平板電腦點菜後，機械人會根據接收到嘅資訊，讀取盤上嘅IC標籤（Integrated Circuit Tag），然後用機械臂將食物放置於托盤，再由店員交俾顧客。
該系統使用松下研發嘅機械人及圖像識別技術。而松下則計劃以海底撈為起步點，進一步開拓中國餐飲市場。
據悉，海底撈中、港、台及日本等地共有逾360間分店，計劃先喺2至3間旗艦店引入以上設備，之後或會進一步擴至其他分店。
余絲韻