絲絲講場：10億賭約 格力珠姐贏硬雷軍？
珠海格力電器董事長董明珠同小米（01810）董事長雷軍嘅「5年10億賭約」仲有兩個月就完。最新分析話格力好大機會贏，今年全年營業額估計有2,000億元（人民幣‧下同）。相反，小米下半年要延續上半年營收增速逾75%先有望勝出！
講番珠姐同雷軍嘅賭約，其實緣自一三年電視台頒獎典禮上，雷軍挑戰同為獲獎者嘅珠姐，話小米營業額五年內必超格力。雷軍講笑話賭注係一蚊，但好勝嘅珠姐點會示弱，於是大番雷軍，將賭注加到10億。
回顧兩間公司今年上半年成績先。格力營收910億元，增速31.4%；小米達796億元，增速75.4%。按此推斷，小米全年營收會喺2,000億元左右，而格力只有1,900億元，睇牌面雷軍會贏。但早排格力殺出，公布預測今年首3季營收1,500億元，按年升逾33%，全年預計營收為2,000億元。世事難料，珠姐仲有機會同雷軍鬥！
內地證券界分析，手機市場競爭大，小米下半年營收增速好難去到上半年咁勁。照咁睇，小米要反超格力，包括第3季在內嘅下半年營收至少要有1,200億元。
小米想食胡要靠物聯網
之不過，珠姐贏唔贏到仲要睇一個變數。有內地證券行估計，雷軍仲有張王牌，就係物聯網（IoT）收入可能大增，令下半年營收增長達100%，嚟個絕地反擊！雖然條數係靠估，但可想像到勝負有幾難分難解。
余絲韻