美股終於響起冧市警號，周三晚美國三大指數大瀉，似乎已經話畀世人知，沽貨好趁早！
港股昨日跌幅比預期小，恒指僅跌255點收報24,994點，主板成交達1,060億元。滬綜指早段曾低見2,531點，幸尾市轉跌為升，最終平收報2,603點。既然個市跌幅收窄，逃生門打開仲唔走等乜？隨時股份清倉大冧價陸續有來，暫時保本最緊要！
市底弱，買股博反彈真係唔好諗住，尤其美股今次大跌主要由估值甚高的科技股帶動，納指周三晚急挫4.4%，創一一年以來最大單日跌幅。在本港上市的科網股當然無運行，騰訊控股（00700）再下潛，全日跌2.4%報269元，真係唔好再問底部喺邊！
總括而言，港股昨日跌幅雖然唔算大，但整體投資氣氛差卻係事實，除非買入金礦股或反向ETF作短炒，否則要贏錢並唔易。
講起反向ETF，近期成功逆市突圍，好似FI南方恒指（07300）、FI南方國指（07388）、FI華夏恒指（07321）等等即市皆創新高，似乎有資金在跌市中，選擇以其出擊又或作對沖之用。
不過，要留意這類反向產品是提供單日回報相反的收益，不宜作長線投資，否則在波動市況下，其累計回報未必等於相關指數相反的累計回報，變相增加持貨過夜成本，故投資相關產品時，建議以短炒為主。
最後，近期大跌市見到有啲股仔甚至創板股突然「上位」，但呢類股仔唔知乜頭乜路，本身冇咩特別消息，突然有人推介，都估到有景轟！好似昨日就有隻創板股，股價先升後倒插幾成，成交額同市值差無幾，睇到缸邊友眼凸凸。
聽咗肥田料上車又走唔切的，真係一殼眼淚。唔想為莊家散貨作嫁衣裳，都係唔好沾手，免貪字得過貧！
古勝