絲絲講場：富豪榜新人王拼多多黃崢身家877億
一八年福布斯中國400富豪榜上，有43位新人上榜。而呢批新進中國富豪中，最巴閉嘅係內地電商平台拼多多創始人黃崢，佢憑112.5億美元身家（約877.5億港元），躋身富豪榜第12位！
馬雲馬化騰許家印齊「縮水」
難怪有人話首次公開招股（IPO）係最好嘅創富工具，今年中國富豪榜嘅新人，大多都係得益於上市，包括喺香港上市嘅小米集團（01810）、美團點評（03690）及海底撈（06862）；同埋遠赴美國上市嘅拼多多（NASDAQ：PDD）、蔚來汽車（NYSE：NIO）等。當中，小米董事長雷軍身家升至119億美元，位居富豪榜第11位；而排第37位嘅美團CEO王興，身家亦升至51億美元。
七月底先喺美國上市嘅拼多多，其創始人黃崢可謂最惹人注目，事關佢間公司由一五年到依家只係成立咗三年，就赴美IPO，刷新行業紀錄，並成為四年來最大嘅中概股IPO，以招股價22.8美元計，等於市值288億美元。
受股市跌同人民幣貶值影響，今年400名中國富豪中，有超過四分之三嘅身家縮水，搞到93人落榜；留低嘅有近三分之一身家減幅達20%或以上。而富豪榜排頭3位嘅阿里巴巴創辦人馬雲、騰訊控股（00700）主席馬化騰及中國恒大（03333）董事長許家印，身家亦分別要縮水40億美元、62億美元及117億美元。
余絲韻