Market Insight：淡風繼續吹 選擇買少見少

美國年內不斷對中國步步進逼，有部分市場人士認為，現時中美情況可與美日八十年代《廣場協議》相比，認為「侵侵」正重施故技。然而，中國經濟增速放緩，正要大舉維穩之際，又豈會容易讓人仔升值呢？結局會如何發展落去，真係天曉得！

股市飽受負面衝擊

不過，有陰謀論者就指，中美查實唔係無得商量，只不過今次要做場大龍鳳，目的係為各自爭取更多政治籌碼。古勝則認為，姑勿論有冇陰謀，相關因素已對今時今日的股市造成負面傷害。「未來」既然難測，故此前只能做好風險管理，起碼就算面對任何環境，都唔會跌到翻唔到身！

昨日港股能夠反彈，其實都只係靠幾隻權重股撐住，例如早前提及被市場視為逆向指標的中國移動（00941）就升2.9%報80.75元，衝穿80元關，似乎仲有得去；滙豐控股（00005）則升0.6%，兩者分別貢獻恒指44點及18點。至於已走晒樣的騰訊（00700）則愈跌愈深，昨日再跌2.5%。

值得留意的是，恒指昨日雖終止六連跌，升得20點報26,193點，但騰訊跌勢未止，加上其他藍籌普遍無氣無力，且市場氣氛同樣陰陽怪氣，故就算後市有反彈，要押中能夠逆市做好個股的難度頗大。如果自問今年「無乜贏過錢」，證明看官都唔係咁適合踢逆境波，建議暫時忍手。

昨日施政報告中，除人工島項目的回響較大外，其他房屋政策與市場早前預期的相差不遠，周二本地地產股偷步升咗，昨日回軟都好正常。在大淡風下，亦不時見有資金押注落基建鐵路及內需股，主要係博中央出手穩經濟。昨日中鐵（00390）、中國鐵建（01186）及中交建（01800）升1至3.4%不等，已持貨者可繼續推高止賺位。

揀基建穩陣過內需

相對地，內需股就比較難炒，事關唔係隻隻升，好似恒安國際（01044）昨日高開4%後，尾市升幅收窄至0.1%；萬洲國際（00288）近期愈升愈有，再升1.7%；而蒙牛乳業（02319）則跌2.3%。

最慘係隻被大行唱淡的旺旺（00151），最終跌6.8%收市，反而康師傅（00322）及統一企業（00220）就分別升0.1%及2.1%。睇番三隻食品股，除統一走勢較好外，其餘兩者走勢都唔多靚仔，加上三者往績市盈率介乎18至32倍，其實都唔平，所以要從基建及內需股中「二選一」，都係揀基建啦！

古勝