絲絲講場：貝索斯論決策呻唔及股神
世界首富及亞馬遜CEO貝索斯出席公開活動時，分享自己嘅一套時間管理哲學，原來佢每日一定要瞓8小時。佢話，身為高管每日嘅主要工作就係為公司發展做決策，所以佢要瞓夠8粒鐘，思路先會更清晰，更有活力，心情都好啲。
不過貝索斯承認，如果瞓少啲就可以做更多決策，但話唔值得。佢覺得如果自己每日做到三個明智嘅決策就夠數，仲笑言好似股神巴菲特咁，佢都話一年只做三次明智嘅決策就夠。
困難決定須五點前做
要管理亞馬遜咁大間公司，貝索斯鍾意早睡早起抖足精神，同小朋友一齊食早餐，過番個輕鬆嘅上午，盡量唔喺朝早10點前開會。佢形容會將傷腦筋嘅會議安排到午餐之前，然後盡力喺下午五點前做比較困難嘅決定。
貝索斯堅持做公司決策貴精不貴多，其實背後有科學支持。因為一個人每日就可能要為着乜衫、食飯食乜、睇書同傾偈之類嘅濕碎嘢做過百個決定，都要用唔少心機，所以你就會明點解好似Facebook嘅朱克伯格以至前美國總統奧巴馬呢啲日理萬機嘅大人物，索性每日都着一式一樣嘅衫。
科學家認為，如果你個大腦日日都要做咁多無意義嘅決定，倒不如減到得番幾個。而對於嗰啲會影響一間市值達萬億美元嘅公司高管嚟講，將決策減到最少就更加重要。
資料顯示，貝索斯目前穩居世界首富寶座，身家高達1,537億美元（約1.2萬億港元），而公司市值就達9,122億美元（約7.1萬億港元）。
余絲韻