孖妹S檔案：金股債匯學「息」追揸沽

梁：海通國際證券財富管理投資策略執行董事 梁冠業

股票：美中期選舉 成後市關鍵

Kitty：山竹捲走咗我行街嘅閒情逸致，但息魔隨時捲走晒我啲Money！

梁：我唔太悲觀，香港加息步伐未必跟足美國。就算跟足，至明年底預料僅上調共1厘，對香港地產股或樓市影響有限。樓市受供求及息口影響，息口加得慢就唔驚啦。

彩兒：股市陰啲陰啲跌，都夠傷啦。

梁：仍有曙光。加息對香港銀行股好，息差擴闊，增加收入，我睇好中銀香港（02388）。況且，恒指市盈率自九三年至今，只有兩次跌穿十倍，分別係九八年金融風暴及一一年歐債危機，而今次我唔覺得會咁差，因外圍大部分壞消息已反映。恒指26,200點料見底，若十一月美國中期選舉共和黨失勢，港股年尾料可升至29,000點。

Kitty：美股不斷創新高，中港股卻狂跌，都係時候嚟個逆轉。

梁：投資者由美股轉投亞股，上周初日股率先彈，好快輪到中港股升。

睇好內銀內險消費股

彩兒：依家買咩股好？

梁：唔使咁急，十月仲係上落格局為主，但整個第四季，只要中國經濟唔太差，內銀、內險及消費股就會炒上。內銀估值平，息率又唔低，仲係恒生指數權重股，故若國家隊或外國機構入市，應會首選內銀股。至於內險股，我一直都鍾意，因內地人對保險產品有強勁需求，且若A股反彈，公司投資收入亦會拾級而上。另外，內地消費股可受惠貿易戰，因出口減慢，內地料會加大力度刺激內需，提振經濟，所以消費股會炒上。

Kitty：內地年內出多招監管醫藥及教育股，令相關股份大插。

梁：我覺得適度監管係合理，有助行業健康發展。若投資者博少少，可考慮買入，因就算國民消費力唔高，喺醫藥及教育上開支都唔會少。

彩兒：我就聽到有其他建議，好似中環資產投資行政總裁譚新強話唔好掂港股，美股反而可能仲有得升，兼睇好基建股。佢仲睇好全球能源股，因美國將對伊朗實施制裁，油價向上。

陳：香港城市大學工商管理課程協理主任 陳鳳翔

加息周期投資建議	海通 梁冠業	梁冠業建議第四季港股配置

外匯：英鎊歐元望轉強 值博

陳：美國唔可以唔加息，依家唔加等幾時？當局○八年狂印銀紙，令經濟穩定，市場進入零息時代。依家美國有條件加息，就應該加，有備無患，萬一將來有危機時，先可以減息應對。

彩兒：美元會一枝獨秀？

陳：美元短線向上，因美國加息，美股強勢，且上周美加達成新貿易協議。但美元長線則下跌，因其他國家就算肯同美國簽署貿易協議，你覺得開心定唔開心？佢哋已逐步減低美元比重，唔想太依賴美國。例如中國八月份外匯儲備為31,097億美元，按月減少82.3億美元。另俄羅斯、土耳其及墨西哥減持美元資產及美債；印尼、馬來西亞及泰國亦宣布喺三國貿易結算中採用非美元貨幣。

人幣明年或失守七算

Kitty：加息會唔會減慢美元被拋售嘅速度？

陳：無幫助，美國對多國嘅制裁令人反感，所以唔單止貿易赤字唔會改善，而減少貿易更會令美國經濟轉差。預計一九年聯儲局會再加息一至兩次就差唔多完。如果再加息，令債價下跌，將導致企業融資成本上升。

更驚嘅係，見國債拋售加劇，炒家或機構投資者跟沽，隨時會爆發全球金融危機。君子不立危牆之下，美元有睇唔透風險，我唔會買。

彩兒：其他貨幣你又點睇？

陳：人民幣或偏軟，一九年仍有機會跌穿7算，但唔會急跌。因中國資本市場未完全開放，而中央唔想人民幣大幅貶值，令市場氣氛差，不利經濟。另美元下跌，其他貨幣，包括英鎊、歐元、加元、澳元及紐元將有望轉強，不妨增持。個別高息新興市場美元債券亦唔錯。另外，若你有足夠彈藥，可沽美股，因其高處不勝寒，遲早會轉弱。若唔夠錢嘅，就揸現金算數，否則被美股挾死就唔抵。

張：金銀業貿易場理事長 張德熙

黃金：長線發力 明年估見千三

張：美國加息，短線美元呈強，利淡黃金，目前金價牛皮，料再有大調整。不過唔使太愁，我估聯儲局十二月會再加息一次，之後加息步伐就會減慢。另貿易戰利好黃金，所以金價長線有望炒上，料一九年觸及1,300美元樓上。

彩兒：以為依家好多人買金避險，金價只升不跌。

張：自金價處於1,700美元，就已累積好多長倉，點知金價一路下滑至現時嘅逾1,200美元。我估要再插到1,150美元，啲長倉先會震走晒（蝕本平倉），到時追入就係好時機。

Kitty：黃金咁鬼老土，點解仲未被淘汰嘅？

張：當然未啦，佢嘅避險作用依舊。面對貿易戰咁多不明朗因素，美國隨時有更強硬措施制裁中國，故料後市波動大，組合宜有三成配置黃金，其餘投資房地產、股債等。不過唔好急，揸住現金先。

譚：中環資產投資行政總裁 譚新強

城大陳鳳翔稱，美元有看不透的風險，自己不會買入。	金銀業貿易場張德熙稱，目前金價牛皮，料再有大調整。	中環資產投資譚新強表示，買國債要留意國家還款能力。

債券：新興市美元短債諗得過

譚：買債好過買亞洲股票。喺加息周期，我唔建議投資美國長期國債，但個別新興市場美元短期債券，如一至三年期嘅都值得投資。新興市場雖有隱憂，但今次嘅程度、速度、廣泛度及感染度唔及九七年，唔覺得係當年風暴翻版。

Kitty：債券對我嚟講仲係好陌生，我淨係知美國十年期債息不斷飆升至3.23%。

譚：提提你，買國債要留意國家還款能力、喺美國加息周期面臨嘅貨幣壓力等。若想買企業債，而該企業又唔多抵押品，你應了解公司債權人嘅優先還債次序。記住買債唔係炒債，預自己揸至到期日，所以一定要揀好債！

華未必陷入債務危機

彩兒：對於中國地方債務問題，你又有咩高見？

譚：中國經濟料將放緩，但又唔覺得會陷入債務危機，因其九成債務為內債，左手欠右手錢，只要中央有決心解決地方債務問題，呢個泡沫唔會爆。另外，可減稅刺激內需，應對貿易壓力。惟目前消費於國內生產總值佔比偏低，靠可持續性消費刺激經濟，也屬良策。

Kitty：以你推斷，中國會用咩方法？

譚：幾難估。內地政策如社保改革，將令個人每月收入減少。而新稅法，即外國人在內地居住滿年半，須申報境外收入並繳交稅項，又與促進中美貿易協議背馳。至於內地降存準率，應純屬周期性措施，而非結構性改革方向。

美緊縮政策料有限期

Kitty：你似乎對美國貨幣政策有啲獨特見解！

譚：美國聯儲局雖於九月調升聯邦基金利率至2至2.25厘區間水平，且議息言論維持鷹派，但我認為再加息三至四次就會暫時停一停，因撇除通脹後嘅實際利率徘徊0至1厘都夠。再者，通常經濟差嘅話，當局甚至會減息至負數。若喺今次加息周期出手次數太多，他日想減息就有排減。

未來縮表速度或趨慢

譚：目前美國國債孳息率曲線趨平，若再加息兩至三次，孳息率曲線或反轉，長債息低過短債息，銀行唔會再願意買短債放長債，以免蝕錢，而企業就難做融資，變相或令經濟放緩。呢個因果關係，令聯儲局唔可以睇輕國債孳息率指標，若長債息跟唔上聯邦基金利率升幅，或迫使加息步伐停一停。

加息之餘，我預計一九年縮表速度都會減慢，甚至停止。美國資產負債表規模已由金融海嘯時嘅8,000億美元增至4萬億美元，料會調低至3.2萬億美元。惟縮表係技術性措施，並唔反映中國經濟好壞。

彩兒、Kitty