Market Insight：中移盡顯避險功能

美國十年期國債孳息率上周再創七年新高，周四即市抽上3.2厘樓上觸動市場神經，美股周四晚急回，可見市場資金確係玩平衡木高手，更唔可以一本通書睇到老，市場反應先至係重中之重。美匯指數同步抽到上約96水平，且官方口脗愈來愈鷹，睇怕美債息都係易升難跌居多，而相關影響將持續一段時間。

當唔少人擔心緊A股今日復市，周日人行突宣布降準，且幅度達1厘，幅度之大反映當前內地經濟真係告急，必須要果斷以大力度降準來支持經濟，否則年近歲晚，一旦出現企業倒閉潮，將對消費和就業造成沉重打擊。

降準隨時加深隱患

這一點人行算是及時拿捏準確，可應對內部改革困難和外部中美問題的挑戰，只是降準還不夠，必須加大力度減稅降費，配合加大開放市場力度，加速引入外資，才有望扭轉頹勢，再創新局面！

至於今日股市，咁大幅降準，老實講係既喜亦驚。喜者乃上大人真係出手救市，至少內房同內銀可以受惠到降準政策，短線可以作出反彈；驚者，從降準幅度推敲到如今內地經濟形勢真係不妙，係咪落重藥就能應對難關，不無變數。

無論如何，本周初恒指反彈，較大阻力在27,656點，初步支持在26,200點水平，追唔追貨？睇高開幾多，自己計吓值唔值博！當然，如今中美兩國的貨幣政策的分化似乎愈來愈多，人民幣的貶值壓力，將會是兩地股市後市的一大隱患，不可不察。

講開關於息口向上消息，早前亦講過收息股可以暫時放入雪櫃，上周五就即該見一批公用股繼續跌。雖然話就話公用股派息穩定，但若然息率與美債息差距唔遠，投資者點都係揀近乎無風險的美債，睇怕佢哋都真係要回番一段長時間。

上周五聯想集團（00992）本來升得幾好，點知轉個頭被外媒指中國安裝間諜晶片竊密，雖然集團中午已發聲明，指硬件製造商SuperMicro並非聯想的供應商，但資金撤走咗又點會咁快番嚟，股價最終跌15.1%，雖然守得住5蚊，但既然股價升跌已涉及國家層面，風險急增下，無貨都係忍一忍手。至於有貨者則應逢高減磅，事關都唔知佢會唔會係下一隻中興通訊（00763）。

晶片股宜靜觀其變

至於其他晶片股如中芯國際（00981）、華虹半導體（01347）及ASM太平洋（00522）等均受消息拖累，跌幅介乎1至3.9%，短期又係要靜觀其變。

反而中國移動（00941）成為跌市奇葩，其實古勝都唔知點解佢可以愈升愈有，唯一可能是市場已將其當正逆向指標及避險股。中移已上破埋九月整固區上方阻力約77元水平，睇怕短線仲有力再上。大無畏之士可小注買入，目標睇83元，跌穿10天線約76.2元止蝕。

古勝