聯儲局再次加息後，本地銀行終於跟隨加息，港股昨日就唔上唔落，最終跌101點報27,715點，主板成交縮到得777億元，似乎投資者在香港加息後，都要需時消化及重新作部署。不過，今次香港四大銀行都只係加0.125厘，未有跟到足。從昨日市場的觀望反應睇，如果恒指短期內衝唔上兩萬八，反而向下失守27,600點，今轉反彈浪隨時玩完。
在中美貿易戰陰霾下，過往高息股往往被視為資金避難所，不過，由於港息口趨升，若以美國十年期國債孳息達3.04厘比較，除非業務有較大發展空間企業，否則吸引力將逐步下降。
好似領展房產基金（00823）及置富產業信託（00778）等REITs，唔係話佢業務前景變差，只不過息率無以前咁吸引，尤其是領展近年累積升幅不小，加上能賣得的商場同車位只會愈來愈少，相信REITs短線仍有調整壓力。
此外，飄忽市都有部分板塊炒上，好似昨日見鐵路基建、水泥及鋼鐵股等舊經濟股都有唔錯表現，其實前者都係炒番中國經濟受貿易戰打擊下，資金博中央下半年將加快基建等因素。
當中以中國中鐵（00390）走勢最靚仔，股價九月中破位而上後，唔覺唔覺昨日又抽升至7.69元收市，加上多條平均線順序向上，MACD牛叉持續，走勢利好，值得吼位買入短炒一轉，跌穿20天線約7元止蝕。
香港似正式開展加息周期，昨日見隻恒生銀行（00011）跑出，升2.1%，咁仲追唔追得過呢？從基本面睇，息口上調確有利銀行淨利息收入，不過睇見佢股價由一六年初近120元，反覆升至今年八月高見216.8元，累升約80%，且此後上升動力有減弱迹象。策略上，除非後市能在成交配合下突破，及企穩前高位阻力之上，否則都係先放入觀察名單先。
古勝