絲絲講場：兩新股首掛 鬥晒生日窩心話
新股首日上市乜都可以鬥一番！中資投行華興資本（01911）及主打外傭客戶嘅SIM卡及增值券批發零售商港亞控股（01723），尋日齊齊掛牌，原來唔只係上市好日，仲係大家晒生日嘅好日子。
華興老總：上市送爸爸
華興資本創辦人、董事長兼首席執行官包凡致詞時自爆，尋日係佢父親嘅生日，仲話自己過去十三年嚟掛住創業，基本上父親正日生日都無陪伴在側，今次公司成功上市，係送畀父親一份好好嘅生日禮物，一表孝心咁話。
包總阿爸聽到呢番話係咪大感老懷安慰？唔知呢，會場上唔覺有大包生身影喎。
港亞主席：成功靠太太
不過肯定嘅係，觸發到同場港亞控股主席蕭木龍嘅小宇宙，喺包總發表孝親之言後，蕭主席亦唔輸蝕，向太太發表愛的宣言！
蕭主席話太太亦係尋日生日，公司成功上市全靠有太太支持，仲趁機宣告好愛太太，公司上市亦係送畀太太嘅最佳生日禮物喎！嗱台詞唔怕熟口熟面，最緊要受。
同場仲見到包總個囡囡Chloe拎住部電話，係咁影係咁影，原來囡囡有任務在身，要做包總嘅私人攝影師，誓要為爸爸留低美好回憶咁話。
紀念品方面，華興資本送上一隻銀色嘅獨角獸，事關公司嘅項目都同新經濟、獨角獸企業有關，送獨角獸就襯晒。
兩間公司大鬥溫馨，咁股價又點先？港亞控股收報2.12元，比招股價高1.12倍，每手帳賺2,240元。華興資本收報24.7元，較招股價跌22.32%，每手帳蝕710元，但包總唔太關注股價短期波動，話大市波動，股價有上落係正常現象，相信只要做好業務，長遠而言，股價會反映集團實力咁話。
余絲韻