孖妹S檔案：後市展望 港股或下試二萬六

易跌難升 撈底風險高

盧：依家熊市三期，即係港股會一浪低於一浪。我估計恒指短線或會反彈至28,200點，但其後會倒跌至26,000點，至年底反覆向下，撈底風險十分高。要入市就要身手敏捷。買港股跌會容易啲；買升就宜追入有國策概念嘅股份，例如中國中鐵（00390）。其股份一度創出新高，而且成交增加，預料股份短期內仍然有升勢。

彩兒：有咩誘因令港股再次炒上？

留意恒指平均市盈率

羅：我覺得係政策驅使，好可能係人行放水，畀信心投資者，中國經濟係好，咁資金先會重投股市。

唔排除特朗普突然收回成命，令出口及內需股，以至整體港股翻生。今年投資打和算好，而我自己年內投資額唔多，但亦好好彩仲執到少少。至於個別股份表現，亦都係等消息面，如果中國政府收番對電玩及手遊嘅種種限制，騰訊控股即炒上。

盧：過去20至30年，若果熊市轉牛市，恒指平均市盈率會由單位數轉雙位數，並連續兩年企穩雙位數，代表進入牛市一期。依家就快下跌到單位數，即第一步到位，咁第二步就可期喇，即股市可以回升。