孖妹S檔案：食月餅學炒股 贏錢過中秋
中秋節係人月兩團圓嘅日子，孖妹早已約定家人今晚一齊食月餅賞月。早前諗訂邊款月餅，孖妹諗到頭痕，所以就走去問尊貴嘅金融人，佢哋年年收名貴月餅收到手軟，肯定知邊款最好食。講到興致勃勃，佢哋仲醒大家幾招「月餅投資法」。
羅：銀河證券業務發展董事 羅尚沛
盧：ASC分析系統創辦人 盧駿匡
諗：成家博客理財導師 徐冠鴻（諗Sir）
馮：豐盛金融資產管理部分析員 馮宏遠
Kitty：呢幾年出咗好多騎呢月餅，例如榴槤月餅，你哋試過未？
羅：榴槤隻味我接受唔到。
馮：客氣。我叫朋友訂咗自家製嘅老餅五仁月餅，夠食了。
彩兒：唔係個個人都似你咁重口味。
馮：榴槤月餅你都食，外國月餅你哋實唔抗拒啦！
彩兒：有錢搵，就講嚟聽聽。
馮：個市真係Mooncake——「悶極」，買美股可能係出路，我睇好軟件服務股及電競股，例如salesforce.com（美股：CRM）及Activision Blizzard（美股：ATVI），食住個雲端業務收成期及電競熱潮。
Kitty：不過我又唔會太愁，港股總有亮點。比起美股長年累月升勢，港股有排追；但過一過中秋節，港股都有沖喜一下。恒指上周連升四日，累升逾千點；上周五大市總成交金額終返回千億元以上，入市氣氛好啲。
彩兒：揀好股買，應該點都有水位嘅。
蓮蓉月餅
波動市 傳統股穩陣
羅：我最愛雙黃白蓮蓉！
馮：一般跌市，就啱炒高息股同公用股，依家就係時候了。情況就好似一盒月餅，當隻隻款都望落好伏，大家照理就會揀番見慣見熟嘅蓮蓉月餅，起碼唔驚食完肚屙。
彩兒：但加息在即，高息股會否危在旦夕？
小注買 吼領展中石化
馮：醒目，入市要睇時機。美國聯儲局今周應該加硬息，而香港銀行體系結餘好快跌穿500億元，所以預計香港今次會跟加，到時高息股就有下跌壓力。我建議，中秋節前頂多小嚼「月餅」，中秋節後先大啖大啖食。另外，一旦市場氣氛轉好，高息股就隨時會跌，所以入咗市後，都要時刻提高警覺。
Kitty：你哋會揀咩股？
馮：領展房產基金（00823）。佢主要靠商舖收租賺錢，而旗下物業租用率高企，且租金堅挺。況且短期亦唔覺樓市會大冧，所以買領展亦應該唔會出事。又或者大家可以買港燈（02638），生意穩陣，股息率亦比同行中電控股（00002）高。
羅：我撐中國石油化工股份（00386），因個市有咩風吹草動，股價都應企得幾穩。
諗：若非買不可，中石化都係我首選。但始終我唔建議買高息股，因銀行定存息率都有1至2%，如果高息股年息率只係得3至4厘，就唔吸引。再者，目前市場上高過50天線嘅股份少於三成，代表後市唔樂觀。
Kitty：雙黃白蓮蓉係好食，但含高膽固醇，我唔想爹哋媽咪食咁多。
騰訊跌到300元先追入
羅：四黃蓮蓉月餅仲香口，但勁超標，對身體唔好。四黃蓮蓉就似手機設備股及騰訊（00700），股份隨時急跌，所以年紀大，真係唔好搞。年輕人要博嘅，可以諗吓喺300元追入騰訊。
冰皮月餅
醫藥股 過咗氣唔吼
Kitty：我最鍾意七星伴月，一次過有七種味覺享受。
羅：冰皮月餅的確老少咸宜。
彩兒：有無啲老人家同細路都啱嘅股份？
羅：醫藥及教育股！但講真我唔覺佢哋好得，但貪得意又OK嘅。同冰皮月餅一樣喇，過咗中秋節就唔會食。
馮：早前醫藥股跌到心臟噗噗跳。如要求老少咸宜，我會揀食品股，華潤啤酒（00291）及蒙牛乳業（02319）過氣了，但康師傅控股（00322）、中國旺旺（00151）及統一企業中國（00220）就成為後起之秀。
Kitty：食品股點解會唔聲唔聲升咁多？
馮：你有無聽過「榨菜就着二窩頭，騎上摩拜遛一遛」，內地人近排由消費升級轉降級，開始節衣縮食。未到糧尾，大家已經食緊榨菜配即食麵，且連私家車都唔敢揸，改踩單車。所以，低端生活必需品自然大賣，相關食品股股價都有望炒高。但食品股股價升幅唔會太瘋狂，所以投資者只宜適量買入。
流心月餅
新股要睇市場氣氛
盧：Quota要用得其所，所以食月餅，我淨揀最正嘅流心月餅，但都係最多食一個！
馮：我就鍾情老餅金華火腿五仁月餅，唔嘥Quota。流心月餅得個炒字，都無人食。好多人買馳名限量流心月餅都係送人，然後收禮者又再轉贈，哈哈。流心月餅就似新股，好易中伏，所以頂多短炒。
盧：最近流入港股資金明顯少咗，新股無得炒。
美團市場大 前景可期
諗：要分析一間公司，真係要有多啲耐性，靜觀其經營風格。啱啱上市嘅，股價好易畀莊家Mark高，所以我唔會貿貿然去買新股。
馮：但美團點評（03690）算例外，佢定價雖然貴，但同餓了麼幾乎壟斷內地網上訂餐平台市場，所以都未必無前景。
彩兒：目前最矚目嘅內地連鎖火鍋店海底撈（06862）又點？
馮：海底撈定價貴，其火鍋底材料供應商頤海國際（01579）早喺一六年上市，最近股價表現一般。有人話投資者要真身唔要醬料，且海底撈業務能否維持強勁增長，都要拭目以待。
羅：流心月餅定新股都好，要食得和味，就要有耐性。流心月餅要先放焗爐叮一叮，而新股都要等待市場氣氛配合買入。
雪糕月餅
同股不同權好另類
羅：雪糕月餅似同股不同權股份，兩者都表裏不一。雪糕就雪糕，喺度扮月餅；而首隻以同股不同權制度上市嘅小米集團（01810），天生做硬件，但又包裝成高科技股。
Kitty：不過都幾好食。
羅：見仁見智，同睇咩味，我唔鍾意雲呢拿雪糕月餅，但如果係朱古力雪糕月餅，都可以嘅。然而，我Buy同股不同權概念，但相關個股就要獨立分析。
盧：美團上周上市，一如市場預期股價都無爆升，且有沽壓，所以我唔建議買入。
馮：雪糕月餅即買即食好啲，擺喺雪櫃遇上停電，雪糕就變水。同股不同權股份亦然，小米及歌禮製藥（01672）都溶了。
Kitty、彩兒