絲絲講場：董明珠為格力被迫做網紅？

明珠姐每次出席公開活動，都會發表自己對於當下行業嘅看法以及格力未來嘅發展大計。由於性格率直，有時明珠姐嘅講話難免得罪同行。有網友笑言，明珠姐咁鍾意表現自己，唔似企業家，反而似網紅。

對此，明珠姐日前喺一個內地商界論壇上回應話：「很多人罵我天天沒事幹，但要是我不做網紅，不公開發聲，格力就要被收購了。」她並反擊網友指，「如果連講真話的勇氣都沒有，還談甚麼對社會負責？」

冀銷售五年增四倍

至於格力未來有何大計，明珠姐話，格力電器要用五年，即係到二○二三年，實現6,000億元（人民幣‧下同）嘅銷售目標。據內地有心人士計算，人仔最大面額只係100元，6,000億元重量約為6,900噸，真係超重負擔！

另外，喺二○一七年，格力電器實現營收1,482億元，姑且當做1,500億元，而6,000億元正好是1,500億元嘅四倍。換句話講，明珠姐五年後能否令格力電器嘅營收提升三倍，真係超高難度！

「無夢想怎會奮鬥？」

對此，明珠姐笑稱：「我只是說有這個夢想，有這個目標，並沒有說二○二三年一定會做到6,000億元。何況，一個人沒有夢想，哪裏來奮鬥動力？」

余絲韻