Market Insight：防守類股有保本價值

走勢上，騰訊股價雖重上10天及20天線，但仍於中期下降通道內；至於平保，股價更重上10天、20天及50天線，走勢較騰訊佳。可是，考慮到外圍不明朗因素仍然頗多，故入市博反彈者僅宜輕裝上路。

食完熊仔再部署

睇埋現時恒指牛熊街貨數據，雖然下方恒指牛證重貨區26,800至26,858點貨量幾重，相當於1,933張期指，但係同現價近兩萬八點相距較遠；相反，恒熊重貨區28,000至28,099點以及上方28,100至28,199點，合共亦等同1,900張期指，睇怕大戶再推高指數食埋啲熊仔，之後至再部署過。正如古勝所言，中美貿易談判結果為港股短期關鍵所在，一旦傾唔成又係瓜多過菜，屆時再殺牛都未遲！

板塊方面，淡市中最常見的就係彈散格局，本周彈力好強的教育股，昨日在獲利盤湧現下「全線大飲茶」。睿見教育（06068）下跌9.4%，中教控股（00839）回吐5.6%，新高教集團（02001）跌2.6%，如果有散戶近期入咗貨又唔識得睇位食胡，睇怕又係白做一場。

中海慢火煎魚格

兩隻風電股龍源電力（00916）及華能新能源（00958）於周二收市後公布業績，昨日股價齊齊下挫，跌幅分別達3%及8.3%，又係典型見光死。另外，瑞聲科技（02018）中午公布業績後股價上演即市V彈，雖然收市倒升1.3%，不過持貨者都已經嚇餐死。所以話現時都真係要夠貼市先好落場，否則就算贏咗都唔夠錢睇醫生。

近期人仔匯價反彈，內房股氣氛都有改善。如果有意博反彈都係揀龍頭較穩陣，起碼流通性夠，要撤退都較易。古勝昨日提及的華潤置地（01109），股價曾衝過上30.1元，可惜未能守穩30元關，日線圖呈射擊之星，睇怕都要整固一輪先可以再上。反而中國海外（00688）昨日雖只升0.2%，但已上破降軌阻力，屬慢火煎魚，唔怕行得慢可以諗諗。

防守類股份成為資金短期換貨對象，主要係港股氣氛有所回暖，炒友自然手痕入市走短線。但要明白，早前資金追入防守股主要目的為保本，故除非港股走勢出現明顯逆轉向上之勢，否則相關股份股價未來隨時又再成為資金避風港。若看官依然睇淡後市，面對近期轉趨飄忽的市況，亦毋須每日出出入入，因面對調整市，不變應萬變才是王道。

古勝