竟然有間生產電器嘅日企，膽敢鬥平同中國公司硬撼，依家市值已高過松下電器同日立？呢間就係大金（Daikin），佢哋嚟緊會攻非洲，賣咩？就係冷氣機。
大金現時係全球最大嘅冷氣機製造商。十幾廿年前，其他日本製造商都驚咗南韓LG，紛紛退出家電市場，皆因啲亞洲對手最叻鬥平。再加上傳統智慧係，愈老字號就愈應專注高端市場。
就只有大金反其道而行，主攻海外大眾化市場，集中賣冷氣機，惹來唔少批評。主管大金亞洲業務嘅峯野義博諗番轉頭：「15年前好多人質疑我哋，話喺亞洲靠多銷難賺錢、無投資意義」。○八年佢哋仲同中國企業合作，膽敢將自己嘅主要技術同人家分享添。
總之擴展夠快，就唔怕你抄。結果大金今時撼低南韓LG同三星，做咗印度市場一哥！
跟住點解揀非洲？佢哋話當地最睇價錢，所以諗住搬番喺印度條薄利多銷橋，會Work咁話。查實，去非洲賣冷氣機，好合理吖！
余絲韻