絲絲講場：滙豐高層慶功鬥飲歌

絲絲聽聞前排請晒班跑數好掂嘅員工食餐好慰勞一番，聞說有成800幾人出席，當然唔少得滙豐香港工商金融主管趙民忠（Terence），連滙豐大中華區行政總裁黃碧娟（Helen）都有出席呢個大Party。

聽講嗰日Terence同Helen喺Party度大開金口齊齊合唱，高歌「依稀往夢似曾見，心內波瀾現……」冇錯，就係《射雕英雄傳之鐵血丹心》嘅主題曲，足足35年前嘅經典，唔知究竟係佢哋邊位嘅飲歌呢？

憑歌寄意《陪着你走》

Terence似乎唱開有癮，一首唔夠喉，仲要再夾其他人唱埋《陪着你走》，唔通憑歌寄意，想同班好跑得嘅員工「一生一世也不分」？

其實Terence喺滙豐都做咗超過三十年，係一個好資深嘅賓架，雖然佢做咗滙豐香港工商金融業務嘅掌舵人只係一年多啲，但肯定繼續會無難度咁「過千山過千海」。

做得銀行被老細捽數乃家常便飯，當跑到條靚數時有老細慰勞一番，之後再跑的確會有力啲嘅！只一味落鞭呢招，今時今日唔Work o架喇！

余絲韻