孖妹S檔案：證券行鬥出奇招谷生意
中美貿易衝突加劇，港股成交減少，證券行坐以待斃抑或諗諗新搞作？孖妹走訪多家老牌證券行，了解吓管理層年內生意有冇大受影響，同埋聽吓佢哋有咩應對方法抵禦港股沉寂。
許：耀才證券行政總裁 許繹彬
郭：致富集團證券業務主管 郭家安
鄔：富途證券國際（香港）行政總裁 鄔必偉
黃：輝立証券董事 黃瑋傑
蔡：香港程式交易研究中心總裁 蔡嘉民
撈埋地產Sell海外盤
彩兒：想喺淡市突圍，你有咩招數？
郭：早排推出限時優惠「密密Trade」，可以用小金額密密Trade或抽新股，唔驚蝕手續費，最啱投資初哥，特別係大學生。
Kitty：但佣金冇最低，只有更低。
郭：你有所不知，「密密Trade」客戶係優先批核網上交易信用額，增加資金流動彈性。另外，計劃嘅保證金帳戶係6個月孖展優惠利率（P+0%）進行交易。再者，要衡量交易費平貴，唔係單留意佣金，仲要睇有冇額外收費，如平台使用費等。
彩兒：仲有咩渾身解數？
郭：慶祝沙田分行新開張，我哋會有迎新獎賞畀新客戶。另外，資產配置上，我哋提供好多選擇，包括基金、暗盤、保險及債券。仲有一樣比較新穎，係公司已擴充業務至地產範疇。其實幾年前已構思緊，今年初終有眉目，推出環球置業計劃，務求幫客人發掘具升值潛力嘅海外物業投資機會。
推出短線曼谷睇樓團
郭：我哋會陪客戶一齊走出香港，去東南亞國家如泰國及柬埔寨等地睇樓、揀樓及買樓，提供一站式服務。最近推出嘅曼谷三日兩夜睇樓團幾受歡迎。
我哋相信唔少散戶手上有閒錢，而佢哋又被辣招嚇怕，所以會開始放眼世界，買海外樓。若佢哋最後幫襯公司買樓，旅費可全免！
交易平台快夾穩取勝
Kitty：你公司早前推零佣金，我未申請就過咗Deadline！
鄔：我哋Sell嘅係自主研發嘅港股交易平台夠掂，速度快，又穩定。訂單交易時間只需0.0037秒。
Kitty：我被港股嘅淡靜氣氛影響咗，所以遲鈍啲。
鄔：我哋就冇喇。唔會因應港股好壞，而調節產品數量，或推出特別優惠。我哋畀客戶買賣嘅產品有港股、A股及美股。股市升跌正常不過，市況差，生意自然少啲。不過，我哋公司客戶數目多，且大多數係年輕人，所以我唔擔心公司生意下跌。截至上周五，有逾400萬用戶選擇富途。
推轉戶優惠 免佣7個月
許：我哋有因應股市表現，推出相應產品。如今年宣傳嘅一個轉戶優惠，幾受歡迎。客戶只要拎住銀行及其他證券行嘅戶口單據嚟開戶，就可享額外一個月免佣，即共七個月免佣。另佣金亦可享行家嘅八折，轉倉費更可全免。
Kitty：喺證券行買賣，仲有咩好處？
許：銀行就似酒店，我哋證券行就似茶餐廳，Sell價廉物美。透過證券行買賣股票更有彈性，孖展槓桿倍數可以做大啲，如用10蚊，就可買夠100蚊貨。另外，若今日沽出，款項已可即調動嚟買貨。
Kitty：我呢啲咁懶嘅人，難搬得郁。
月月搞講座與客溝通
許：上年市旺錢易賺，就話唔志在佣金多定少；今年淡市，仲點會唔志在？
再者，上年新股熱潮，今年就冚旗，而且港股年內表現麻麻，所以投資者入市意欲大減十分正常。好彩，今年我哋嘅客戶人數仍有增長，由年初23萬增至現時25萬。
彩兒：相信係你哋嘅功勞嚟嘅。
許：今年我哋舉辦多咗講座，以往每季一次，依家每月一次。雖然港股唔掂，佢哋仍會揀板塊入市，偏好物業服務股，如彩生活（01778）、雅生活服務（03319）及碧桂園服務（06098）等。當然，佢哋亦搵緊其他投資門路，包括投資環球期貨及期指，以至美股。散戶鍾情為人熟悉嘅大價美股，如Facebook（美股：FB）、Tesla（美股：TSLA）、Caterpillar（美股：CAT）、蘋果公司（美股：AAPL）及亞馬遜（美股：AMZN）等。
設立自動抽新股服務
黃：今年市淡，投資者入市意欲低，但見新股上市數量都仲好多，而且多數新股上市頭幾日仍可炒供求，可望股價向上，我哋七月份推出咗IPO Easy試驗服務。
Kitty：有幾Easy？我要懶人包。
黃：服務讓個別客戶，包括新舊客戶授權公司自動認購所有新股各一手，當然客戶可提早不認購某隻新股；至於幾時沽出，就由客戶決定。
Kitty：一手少少哋，啱我玩。
黃：係呀，先滿足零售客戶，而唔係頭槌飛客戶。IPO Easy客戶只要維持約1萬元資金喺戶口，就可以抽新股，萬一真係差少少唔夠畀認購費，我哋都會借住畀客戶先。
調撥機制買港元基金
彩兒：有啲新股聽都未聽過，貿然認購會唔會容易中伏呢？
黃：客戶Join咗呢個計劃，若唔想抽某隻新股，只要提早講定就得。提一提，有時冷門股先至升得最勁。
彩兒：仲有咩吸引客戶入市嘅高招？
黃：我哋唔太着重以減手續費吸客，而係着重點樣幫客戶致富。上年七月，我哋推出餘款寶，等客戶更靈活使用港股戶口內嘅閒置資金。當港股戶口內嘅閒置資金達到2,000元或以上，自動調撥機制就會啟動，預留500元後，就用呢筆錢買入港元貨幣市場基金，基金每年淨收益逾1.1厘。
Kitty：1.1厘唔算十分吸引。
黃：不過，呢筆錢可隨時贖回用嚟買股票，年息會按日計。
彩兒：有冇諗過幫客戶投資其他基金？
黃：當然會，公司一向重視產品多元化。我哋先推出港元貨幣市場基金，因散戶買港股多過A股，而結餘都係主要用港元。另我哋計劃緊下年上半年推出人民幣貨幣基金。
開證券戶口留意三大點
彩兒：揀喺邊間證券行或銀行開股票戶口時，你會考慮啲咩？
蔡：第一，佣金平定貴。若佣金太貴，可能賺咗都畀晒佣。如交易佣金0.25%，買賣一出一入唔見咗0.5%，若本身諗住賺2%，咁四分之一就冇咗。
第二，平台係咪穩定。我鍾意短炒，多數喺市況最波動時入市，若想入市，無端端登入唔到，或者落盤時Hang機，唔知自己買咗未，咁就大鑊。第三，戶口有冇提供多元化理財工具。若戶口畀我同時買賣證券及衍生工具，資金就唔使調嚟調去，款項可更靈活運用，可能朝早沽出股票，晏少少就買番隻輪。
Kitty：證券行吸客方法各不同，有啲帶客人投資海外物業，有啲容許一次過授權，自動幫客戶抽新股。呢啲橋你Buy唔Buy？
宜買防守性股抗貿戰
蔡：對我嚟講，新股及東南亞國家物業嘅吸引力有限。我一向少抽新股，雖然有時抽中即放有水位，但上年好多熱爆嘅新股，如閱文集團（00772）、雷蛇（01337）及易鑫集團（02858）都潛水，所以我都係唔掂好啲。至於買樓，我首選都係香港樓，或者鄰近嘅珠海及深圳樓，始終係自己較熟悉，同埋仍睇好佢哋有得升。但我暫時未出手，只係留意吓。
彩兒：聽落你投資幾謹慎，中美貿易戰愈演愈烈，你靜觀其變？
蔡：No，我上周先做AH股套戥，買A沽H，因見A股七月一路跌，超賣情況勁過H股，所以我博滬綜指會急起直追，爬番頭。
黃：我建議買防守性股，如公用股及高息股。我相信，中電控股（00002）及香港中華煤氣（00003）可以繼續逆市向上。
彩兒、Kitty