Market Insight：醫藥股整合強者愈強
港股上周五跌市收場，皆因人民幣又跌過，A股低收。雖然人行官員話人民幣唔會貶破七，但美匯指數突破一年高位，咁就唔到人行話唔貶就唔貶。睇到如此形勢，有貨減緊啲，咪揸咁多過假期，都係合情合理，何況恒指已由月初低位反彈成千點，仲想點？
睇番幅圖，恒指呢浪的反彈阻力應該喺29,000點，到底攻唔攻得破，古勝認為呢個星期都幾關鍵，皆因周四又輪到中美互相加徵160億美元商品關稅生效，加上美國擬加徵兩千億美元中國商品關稅的公眾聽證會會期，屆時市場焦點好可能又集中在貿易戰上。
憂恒指彈完再散過
呢個禮拜推上指數，待下旬再殺落的機會本來唔細，可惜又傳來土耳其里拉暴跌，新興市場又再醞釀狂風暴雨，若然港股呢浪真係完成反彈再跌過，下一個低位會在27,676點之下，各位要好自為之。
執筆期間，傳來恒指公司公布恒指系列季檢結果，恒指加入中國生物製藥（01177）及申洲國際（02313）。繼石藥集團（01093）後，又一隻醫藥股加入藍籌行列，顯示人口老化下，醫藥行業發展的錢景無限。至於申洲染藍，預期之內但亦算是有點驚喜，短線股價試叩百元大關不足奇。
至於中國恒大（03333）及融創中國（01918）未成功染藍，則為預期之內，皆因會令內房比重過多。反而中國燃氣（00384）算係大熱倒灶，短期股價或有沽壓。
集中講吓內地醫藥行業，其實與內地食品業出現類似的情況，就是市場雖大，但行業規範化不足，加上監管和法規有待完善，以及商業道德觀念薄弱，即使是已上市的大型企業，都曾出現產品質量問題已引發社會抨擊。遠的有大頭奶粉事件，近的有假疫苖事件，在在說明這個行業機會多，但陷阱亦同樣多！
不過，回顧內地乳業未有因毒奶事件而一沉不起，相反，在政府加強監管，扶持龍頭企業以推動行業規範化之下，大型乳企受惠政策及行業整合而茁壯成長。同樣道理，照計可應用在醫藥股身上，皆因14億人口，有病就要醫，不能無藥食。
加強規管 龍頭受惠
可以預期，內地政府將會加強對醫藥行業的規管，在生產、銷售及研發方面會定出更嚴格的要求，並會嚴格執行淘汰機制，嚴厲執法以打擊不法行為。在此情況之下，中小型醫藥企業更難生存，反而大型業者將可面對更多併購機會，行業趨勢將會更加歸邊。
故此，趁眼前的調整期，中長線部署實力醫藥股，係諗得過。只係考慮到市況偏淡，待技術指標出現嚴重超賣時才分注行事會較可取。但補充一句，在下唔多鍾意揀民企股，即使係醫藥股，都係傾向揀啲有國家資本背景的會較穩陣，免得一覺瞓醒，高管不見了，不知怎辦！
古勝