絲絲講場：鍾少權忙到爆 返新工兼趕論文
近年銀行界多人事變動，創興銀行（01111）個人銀行部有新賓卡上場，原來成功請到永隆銀行零售銀行部主管鍾少權（Derek）過檔，今個星期一已經履新。
過檔創銀出任總經理
喺創興銀行出任總經理兼個人銀行部主管嘅Derek，原來喺舊東家永隆已經做咗超過五年，上個星期先正式離職，可謂極速返新工，期間完全無放過大假。
DBA最後衝刺 無得抖
佢講起近排生活公私兩忙，唔止事業有新挑戰，原來學業都「大成功」，佢近年一直喺香港理工大學兼職讀DBA（工商管理博士學位），連放假都要趕功課，今個月過埋論文面試就功德圓滿，仲話如期三年內完成到好開心！
絲絲對Derek印象最深刻嘅，就係佢係一個運動迷，尤其係踩單車，曾經8日半完成台灣環島單車行，以前亦有參加毅行者，不過自從佢要兼顧學業之後，就好似練得無咁頻密，不過見佢仍然Keep到好Fit喎！
佢練少咗單車，最開心係邊個？相信係成日叮囑佢踩越野單車時要做足安全措施、戴好頭盔嘅銀行公關，因為Derek不時要出席公開活動見傳媒，如果唔小心撞親個樣，搞活動個公關就頭痕！
余絲韻