絲絲講場:股壇老行尊80歲張天生轉工爭住請

80歲轉工,仲被人爭住請,簡直係職場上嘅完美示範!講嘅係股壇老行尊張天生。

佢入行六十年,不但誓不言休,仲即將轉工,由星展唯高達過檔到佢老友許照中旗下六福金融。佢尋晚趁住喺星展唯高達Last Day,大搞告別派對,宴請大量好友、前上司等,最少80人畀面出席,一齊慶賀佢人生中「第三次」跳槽。

揀六福金融 貪夠自由

張天生話要轉工,多間券商都向佢招手,好似「舊舖」新鴻基適逢明年創立50周年,好想曾協助創立公司嘅張天生「回歸」。但佢話唔想咁大壓力,最後揀咗去六福金融。一來同許照中老友鬼鬼,六福金融好多同事張天生都識。二來係自由度高,許照中話畀間房張天生坐,佢話驚自己行開行埋冇人幫佢聽電話落盤,寧願同盤房同事一齊坐!佢仲連底薪都話唔要,做咗幾多生意就五五分帳咁話。

自從新鴻基証券九六年易手,張天生就過檔唯高達,○一年唯高達與星展前身嘅旗下證券公司合併,一路做咗22年。點解無端端唔做?佢話自己已80歲,銀行制度好難再請一個80歲嘅老人家,所以選擇辭職。

不過,據絲絲聽聞,今次和平分手,係星展唯高達想行新制,即經紀一旦離開公司,唔可以帶埋客戶走。由於好多客都係經紀多年來搵番嚟,建立咗長期關係,所以對新制度有保留!

余絲韻