津上精密機床（01651）主要業務係製造機床，究竟咩係機床？即係用嚟切割同處理精密金屬零件嘅生產設備，換言之好多日常生活用品都用機床去生產。公司首席執行官唐東雷透露，細至電子煙、無人機嘅零件，大至汽車都可以生產。但係有樣嘢，佢話點都唔會做，就係武器！
唐總話，精密如槍械，佢哋嘅機床都可以生產到，甚至試過有人想叫佢哋生產子彈，認為佢哋可以造得好精細，提高射擊準繩度咁話，但公司最後都Say No。
點解有生意都唔接？並非因為價錢問題，而係唐總認為，製造子彈出嚟，造得愈精細殺人愈容易，所以講明公司只做民用產品，軍用產品訂單就一概拒絕。
余絲韻