絲絲講場：宅男怎變比特幣礦機王？
八十後電腦博士生，日日沉迷動漫，一年睇超過500套，仲唔係「超級宅男」？嗱！世事無絕對，絲絲講嘅，其實係申請緊香港上市嘅內地比特幣挖礦機生產商Canaan（嘉楠）嘅創辦人兼董事長張楠賡，佢公司舊年賺成3.6億元人仔！
呢位張董今年先35歲，喺網上以ngzhang嘅ID行走，所以行內綽號叫「南瓜張」。佢喺內地比特幣界無人不識，唔少「礦工」都幫襯過佢買挖礦機。
研發礦機為世界和平
講到挖礦機，晶片嘅運算能力就係一切，若有部挖礦機運算能力高過整個比特幣世界嘅51%，就有能力篡改交易紀錄，甚至可以搞破壞。一二年美國就有間公司研發用ASIC晶片嘅新一代挖礦機，運算能力可以勁過晒市面上所有挖礦機，換言之足以搞冧比特幣世界。
當時南瓜張喺北京航天大學讀緊博士學位，佢除咗係動漫迷、活躍網上軍事論壇嘅超級軍事迷外，亦係比特幣Fans。於是佢話為咗「維持世界和平」，索性自己去開發ASIC挖礦機，話要抗衡吓。就係咁，佢發明咗內地首部ASIC挖礦機，仲將部機命名為「Avalon」（阿瓦隆），即係亞瑟王傳說中嘅「天佑之島」極樂世界。
由霸氣條款到搞上市
既然開發得，當然會賣畀人。批機一接受預訂就被搶光兼勁炒，一機難求下，有傳話南瓜張當年接受預訂時設有超霸氣條款：絕不退款、風險自負、零客戶服務（講明唔識用咪買）、收貨地址一經確定唔畀改。
南瓜張同班手足當年賺到癲，幾年間仲發展到今時今日申請上市。跟住會點？比特幣嘅世界轉變速度快成咁，唔知呢。
余絲韻