絲絲講場：債券通一周年 小加勁Sell「貝字牆2.0」

論壇邀請多位重量級嘉賓，包括人民銀行副行長兼外匯管理局局長潘功勝、人民銀行金融市場司司長紀志宏等。

去除負面字眼添設計感

小加喺主持環節「起步債券通：人民幣國際化的新征程」，除咗大講債券通外，臨尾仲向同場討論嘉賓大Sell港交所幅「貝字牆2.0」。

佢話，初初幅牆有較多「貝」部嘅字，因為「貝」可解作「金錢」，而金錢有利有弊，故有「賤」、「賊」等負面字眼，不過引來唔少意見，於是拆完再做，依家就好有「馬賽克」Feel。佢大讚現時幅牆有「意想不到設計感」，仲力邀嘉賓完咗論壇去影相。

講番債券通，小加話債券通嘅出發點係促進內地資本市場國際化及開放；現時中國係全球第二大經濟體，又係全球第三大債市，所以唔再講債券市場規模，而係國際化。

佢又話，「北向通」推出一年嚟發展順利，期望繼續加強債券通服務，令債券通更市場化、更有競爭力。佢仲寫包單，債券通「南向通」一定會出現，只係短期內仲有好多工作要做。

人民銀行金融市場司司長紀志宏亦話，「南向通」已有技術上基礎，但需要兼顧市場需求，而該行就一直同金管局及港交所商討緊咁話。

余絲韻