絲絲講場：「獨角獸放屁」噴到馬斯克
美國電動汽車公司特斯拉（Tesla）創辦人馬斯克捲入「獨角獸放屁」風波？事緣一名美國藝術家Tom Edwards喺二○一○年創作咗一隻「放屁獨角獸」，印咗喺一隻陶瓷杯上，仲寫住「電動車對環境好，因電力嚟自魔法。」
馬斯克見到即刻心心眼，舊年仲喺美國社交網站Twitter上話：「呢隻可能係我最鍾意嘅杯。」之後，呢隻公仔相繼喺Tesla汽車控制台屏幕、應用程式、年度聖誕卡等地方出現，結果就出事喇！Edwards覺得畀人侵權，就搵律師幫手，出律師信畀馬斯克話大家要傾吓。
Edwards接受外媒訪問話，佢唔係要大額金錢賠償，亦喜歡公仔被用喺Tesla上，只不過要畀番合理嘅報酬佢，又話馬斯克會為因支持藝術家嘅權利而成為英雄。
Tesla上市8年 飆13倍
不過馬斯克就回應，佢哋冇喺呢個公仔上得到任何金錢利益，反而質疑藝術家Edwards想博出名，增加隻杯嘅銷量咁話喎。
講返Tesla八年前六月廿九日喺美股納指上市，如果當時用1,000美元入貨，以當日收市價23.89美元計，淨係去到周四收市349.93美元，累計已收返逾14,000美元，回報成13倍！Tesla周五開市早段報351.18美元，升0.36%。
余絲韻