特許金融分析師（CFA）課程踏入55周年，真係可喜可賀！由上世紀一九六三年首辦考試，只係得284人報考，到今屆全球將近有23萬人報考，創歷史新高。當中，亞太區考生增幅更稱冠全球，而內地考生人數增幅繼續領先區內其他市場，究竟點解呢？
唔通印上CFA特許資格嘅卡片，畀人嘅第一印象真係咁Pro，咁專業？無錯！CFA協會總裁兼首席執行官施博文話，CFA有助提高投資管理業水平，並推動金融服務成為大眾心目中嘅高尚職業。CFA協會亞太區董事總經理連伯樂話，僱主對CFA嘅需求日增，內地投資行業正急速發展，要求投資業界提高服務質素，所以大批內地考生搶住考CFA囉！
其實，數數任職於業內眾多國際知名金融機構，包括摩根大通、瑞銀、美銀美林等公司嘅CFA資格持有人，就已超過15萬人。所以話，要投身呢行，內地業界人士又點可以唔報考CFA呢？今日舉行嘅本屆CFA考試，亞太區考生高達12萬人，當中內地考生升幅居區內榜首，按年升48%，其次係澳洲，上升36%，至於印度就按年上升咗30%。
余絲韻